Central Police Headquarters, Victoria
Mon - Fri: 8.00 am to 4.00 pm.
Emergencies
999.
Crime Sropper
133

Communique

Kominike Lapolis

En zonm 27 an anploye koman en  labourer ki reste dan sou distrik Zimbabwe Baie Ste Anne Praslin  in ganny anmenn devan lakour Mazistra lo Praslin ozordi apremidi koman sispe dan 7 lensidan tel ki trespass kriminel, kase e antre dan batiman avek lentansyon pour vole, osibyen ki pour lofans vol dan lakaz.

 Target sa sispe in pliz-ou-mwen bann letablisman touristik dan sou distrik Anse Posession ek Zimbabwe raporte arive ant le 4 Avril ek le 23 May sa lannen.

 Mazistra in ordonnen ki sa sispe I ganny rimann pou li repas ankour Mahe le 6 Zen antretan ki lapolis I kontinny son lanket dan sa bann ka.

 …………………………………………………………………………………..

En garson 19 an ki reste Cascade ki tin ganny arete le 21 May ti ganny anmenn ankour yer Lendi kot mazistra ti ordonnen pou li ganny retenir ziska ozordi.

 Ozordi apremidi sa sispe pour lofans bat son kanmarad e tretman volyans, andomaz propriyete e trespass kriminel in repas devan lakour mazistra kot in ganny large lo plizyer kondisyon.

Sa I konpri; pa enterfer avek temwen dan son bann ka, pou sinny liv lakour korgard Anse Aux Pins lendi ek Vandredi, ki I pa ganny trouve lo semen ant 7er diswar a 6er bomaten, sinny en kosyon larzan e pa angaze dan okenn konportman dezordonnen pandan letan ki I deor lo liberte provizwar.

Sa sispe ki ekspekte repas ankour le 17 Zen ti komet sa bann lofans le 11 Avril ek le 21 May.

……………………………………………………………………………………….

Finalman en zonm 45 an ki reste Anse Aux Pins in ozordi ganny formelman sarze devan lakour mazistra pour 2 diferan lofans akt endesan an piblik osibyen ki pou lofans konportman dezordonnen. Sa akize ti komet sa 2 lofans akt endesan le 29 Mars ek yer Lendi le 23 May borlanmer dan distik Au Cap.

Lakour I egalman large sa akize lo serten kondisyon ki enkli 2 kosyon 5000 roupi, en pou sak sarz ki si I pa peye ziska sa Vandredi I pou reste lo rimann ziska le 30 Me zour ki I pou reganny anmenn ankour.

Si I pey son kosyon e ganny large, lezot kondisyon I ki I pa enterfer avek temwen dan son ka e osi sinny liv lakour kordgard Anse Aux Pins dan lendi ek Vandredi.

Kominike Lapolis

1 garson 14 an, 2 aze 15 an avek 1 ki annan 17 an in ganny arete e pe pas atraver bann prosedir lanket an relasyon avek lofans andomaz propriyete apre sispekte pour anvoy ros dan 2 transpor osibyen ki en lakaz yer swar dan distrik Au Cap.

Okour sa bann lensidan, apard andomaz transpor, e kraz vit ek lakaz,  en pasaze madanm dan en bis SPTC ki ti pe fer direksyon Was Mahe ti ganny trete pou dimal dan latet kot sant lasante Anse Royale apre ganny large.

Premye lensidan anvoy ros dan bis kot sa madanm ti ganny dimal dan latet ti raporte kord gard Anse Royale ver 6:40, tandis ki anvoy ros dan loto ek lakaz rapor ti ganny fer kordgard Anse Au Pins ant 8er a 8:10.

Sa bann lensidan ti raporte arive dan zanmerant Ex Reef Hotel e tou le 4 zenn garson ki reste Au Cap ti ganny arete ver 8:45 yer swar menm.

Lanket dan sa ka I kontinnyen.

 Lapolis pe osi raporte ki apre plis en semenn lanket e loperasyon resers entansiv lo later, dan lanmer otour e osi parlao zil Silwet pou retrouv Peter Guy Clement, sa britanik raporte manke lo sa zil, ziska prezan rezilta I ankor negativ. Lanket I kontinnyen dan sa ka.

Kominike Lapolis

En zonm 31 an sorti dan distrik Point Larue in ganny sarze devan lakour Mazistra Anse Royale. Pour lofans kas lakaz e vole ki ti arive le 6 Desanm 2021 e pou vole dan en transpor ki ti arive le 14 Me 2022. Toulede lofans ti ganny konmet Point Larue.
 
Lapolis ti anmenn en mosyon  atraver prosekisyon pou demande   ki sa aprezan akize i ganny rimann pou sa 2 lofans ki in konmet. Mazistra ti akord demann lapolis pou riman li prizon Montagne Posse ziska le 6 Zen kot i espekte re pas ankour.

En zonm britanik I ganny raporte manke lo Silwet.

Loperasyon resers I an progre lo zil Silwet pou retrouv en viziter zonm britanik 57 an ki ti lo vakans Labriz Silwet.

Dapre levidans ranmase an relasyon avek lanket ki pe egalman fer dan sa ka, dernyen fwa ki sa msye ti ganny vwar ti ver 11:45 dimans le 15 Me dan rezyon lale pou la ver Gran Barb litousel.

Angaze dan  loperasyon resers I zofisye lapolis enkli “drone”, zofisye militer ki enkli gard lakot, “rangers” ki travay lo Silwet osibyen ki serten travayer sa letablisman touristik.

Rapor sa britanik manke ti fer avek lapolis ver 9er diswar yer swar par lotorite lo sa zil.

Kominike Lapolis

Sa zonm 31 an ki tin ganny arete koman sispe pou lagresyon fizik e koz dimal  en zonm 35 an dan son latet osibyen ki pou bat en fiy 18 an Sanmdi lo Pralen in ganny anmenn ankour ozordi kot in ganny sarze pou lofans bate e osi koz dimal grav son kanmarad. Sa aprezan akize in ganny rimann Bois de Rose ziska ler I repas ankour dan 14 zour.

Sa lensidan kot sa viktim zonm 35 an ki ti dan konpani sa fiy 18an ti raporte ganny tape avek ros deryer son latet e apre sispe ti fors sa fiy 18 an dan en pick up e al bat li lo lans Amitie ti ganny raporte avek lapolis Sanmdi le 14 ver 5:55 apremidi. Sa lensidan ti raporte arive Baie Ste Anne.

3 parmi sa 4 sispe dan lensidan kas batiman e vole ile Du Port I ganny sarze.

Lapolis in raporte ki sa zonm sispe sorti Mont Buxton avek sa enn ki reste La Gogue ki tin ganny arete e ki ti lo rimann an koneksyon avek lensidan vol kot stasyon Petrol Ile Du Port mwan pase in yer lendi le 9 Me ganny sarze devan lakour Mazistra pou lofans kas batiman e vole.

En 3yenm sispe zonm dan menm ka ki sort Vilaz kensi li in ganny sarze pou poseyson propriyete ki I pann kapab eksplike kot in gannyen, tandis ki en 4yenm sispe ki ti ganny large lo kondisyon Mardi pase li in yer ganny akite dan sa ka.

Mazistra lo sa ka in sepandan ordonnen ki sa akize sorti Mont Buxton ek sa enn Vilaz Kensi I ganny large lo serten kondisyon tandis ki sa enn sorti La Gogue I ganny rimann Prizon Montagne Posee ziska son ka I fini ganny ekoute par lakour.

 

En zonm 49 an lo La Digue in ganny rimann prizon Montagne Posee ziska son bann ka I fini ganny ekoute par lakour.

 

Sa zonm ki ti deor lo serten kondisyon enpoze lo li par Mazistra  an  relasyon avek serten ka kriminel kont li,  ti resaman kas sa bann kondisyon lo La Digue apre ki I tin ganny arete pou lofans sou enkapab, konportman dezordonnen e servi langaz obsenn dan ladrwa piblik.

En 2yenm sispe in ganny arete dan lanmor Sherleytine Ernesta.

Lapolis in aret en dezyenm sispe dan ka lanmor Sherleytine Ernesta, sa fiy 21 an sorti Mont Plaisir Anse Royale ki son lekor ti ganny dekouver dan leo Bougainville Merkredi tar bomaten.

Sa I en fiy 18 an ki reste Anse Royale kin ganny anmenn devan lakour Siprenm ozordi bomaten e ganny rimann ziska le 18 Me.

Sa 2 yenm sispe ki ti ganny arete yer swar pou aprezan repas ankour ansanm avek sa zonm 45 an, premye sispe dan sa ki li I deza lo rimann.

 

Lapolis pe antretan kontinnyen avek  lanket dan sa ka mert.

Kominike Lapolis

Lapolis in raporte ki sa zonm 27 an sorti Reef Estate ki ti ganny arete granmaten le 19 Avril, ganny anmenn ankour plitar menm zour e ganny rimann, in formelman ganny sarze ozordi pou lofans lagresyon lo 2 zofisye lapolis. 

 Sa akize in ganny large lo serten kondisyon tel ki en kosyon 5000 roupi “cash”, pa pou repet menm lofans letan ki I deor, pou pa enterfer avek temwen dan sa ka e pou sinny liv lakour kot Stasyon Anse Royale dan lendi ek Vandredi.

1 lanmor, 1 lot viktim dan ICU e 2 larestasyon dan dife lakaz Baie Lazare.

Lapolis pe raporte ki en madanm 38 an ek en zonm 33 an in ganny arete e pe ganny detenir  swivan lensidan kot en pti garson 15 mwan in perdi son lavi dan en dife lakaz Val Mer Baie Lazare yer swar. Sa 2 dimoun, ki trouv manman ek papa sa pti garson kin mor pe fer fas avek prosekisyon pou lofans neglizans kont zanfan.

 Lekor sa pti garson ti ganny dekouver konpletman brile anba lili par lapolis apre ki lazans servis tenny dife ek sovtaz tin fini tenny sa dife ki lapolis ti ganny enformen lo la ver 8:25 yer swar.

 Dan sa menm lensidan dife, en madanm I admit dan younit swen entansif apre ganny brile lo son lekor antye e son kondisyon in ganny dekri koman kritik, tandis ki en msye li ti ganny trete apre ganny large.

 Lanket konzwent lapolis ek lazans servis tenny dife ek sovtaz I kontinnyen dan sa lensidan trazik.

Kominike Lapolis

n Msye 74 an avek Nasyonalite France ki ti lo vakans Sesel in perdi son lavi tar apremidi Anse Source D'argent La Digue dan en lensidan.
 
Lapolis ti ganny alerte lo sa lensidan ver 4er 17 apremidi apre ki sa Msye tinn ganny anmenn kot sant lasante Logan La Digue pou swen medikal kot i ti ganny sertifye mor par dokter kot sa sant lasante. 
 
En lanket in komanse pou esey etablir sirkonstans annatandan rezilta letopsi pou determin ekzakt lakoz sa lanmor.

About

The police force in the Seychelles is a national body which falls under the control of the National Commissioner of Police, who is appointed by the President subject to the approval of the National Assembly....

Contacts

Police Headquarters, P.O Box 46, Victoria, Mahe, Seychelles

Email us on:
info@police.gov.sc

Contact
Phone: 4288000


Privacy Policy

All press release and communique on this website is copyrighted content from the Seychelles Nation, Today newspaper and The Seychelles Police force.

Cookie Policy →