Crime Stopper and Service Complaints call 133  | For Emergencies Call 999

Central Police HQVictoria, Mahe

Emergency Only 999

Propriyeter diskotek Katiolo Simon Esparon i mor dan en lensidan vol kot son lakour

Simon Esparon, propriyeter diskotek Katiolo, in mor apre ki in toufe swivan en lensidan vol yer granmaten kot son lakour, Anse Faure dan distrik Anse Aux Pins. Lakour Msye Esparon i trouve pa tro lwen avek diskotek Katiolo ki i ti konstrir plis ki 40-an pase. Lapolis in ouver en lanket pour konn sirkonstans lanmor Msye Esparon e portparol sa lafors, Msye Jean Toussaint, in dir avek medya ki letopsi lo lekor Msye Esparon in fini ganny fer e rezilta i montre ki i’n toufe. Msye Toussaint in dir ki lanmor Msye Esparon, aze 67-an, pe ganny kategorize konman en ka mert.

«Sa lensidan ki’n arive bomaten (yer bomaten) Anse Faure i enn ki lapolis pe donn tou son merit. I en lensidan ki pe ganny trete tre seryezman,» i ti dir. Pour montre merit ki pe ganny donnen avek sa ka, letopsi in fini ganny fer lo lekor Msye Esparon e rezilta lakoz son lanmor se ki in toufe.

«I posib ki son labous in ganny peze a en serten pwen akoz dapre konpran i annan serten mark obor son labous e i pa mark blesir parey en dimoun ki’n ganny tape,» i ti dir. Msye Toussaint ti eksplike ki dapre rapor, ti annan trwa zonm dan mask ki’n antre dan lakaz sa viktim ek son madanm avek lentansyon pour vin rod larzan.

«Sa lensidan in ariv anviron 3er bomaten me lapolis ti ganny enformen formelman ver 5er38 bomaten e deswit konman sa in ganny raporte lapolis Anse Aux Pins ti premye pour ariv kot sa landrwa. Sa ki nou’n kapab konstate son madanm ti’n ganny anmare, son lanmen ek son lipye, e osi son labous. I’n ganny latansyon medikal apre in ganny large,» i ti dir. Msye Toussaint ti fer resorti ki plizyer younit enterdepartmantal pe travay lo sa ka.

I ti dir ki lapolis pe ranmas plis lenformasyon posib e si i annan okenn devlopman signifikan ki lapolis i santi i bezwen kominik avek lamas popilasyon, se sa ki lapolis pour fer. In osi lans lapel avek nenport manm piblik ki annan serten lenformasyon pour vin devan pour ede fer lanket bouz pli vit. Msye Esparon i dezyenm dimoun dan lespas de semenn ki mor dan bann sirkontans ki lapolis pe tret konman mert. Premye ka i konsern Derick Gill, aze 46-an, ki ti mor dan lannwit Dimans le 15 Oktob, Praslin. I deza annan en sispe lo rimann e i ekspekte re-aparet ankour le 30 Oktob.

Lapolis i ekspekte anmenn sarz kont li letan i pas an kour.

Antretan, lapolis in konfirmen ki lekor en zonm etranze in ganny trouve pe flote yer dan lanmer dan rezyon lotel New Emerald Cove, Praslin. Sa lekor ti ganny ranmase e sertifye mor par dokter kot lopital Baie Ste Anne. Lekor sa zonm in fini ganny idantifye par son fanmir ki ti avek li Praslin pour vakans. Lanket pe ganny fer an atandan rezilta letopsi pour etabli lakoz lanmor sa zonm Franse.