Crime Stopper and Service Complaints call 133  | For Emergencies Call 999

Central Police HQVictoria, Mahe

Emergency Only 999

Lapolis pe rod en sispe an koneksyon avek en ka dife

Lapolis pe rod en sispe an koneksyon avek en lensidan dife ki ti arive Lendi swar Corgat Estate, Mont Fleuri.

Se dan en konferans lapres yer ki portparol lapolis, Jean Toussaint, ti lans en lapel pour ki sispe dan sa zafer, Kenny Franchette, i raport kot lapolis.

«I en zonm 37-an e dapre konpran i frekant Glacis, Anse Aux Pins e osi Corgat Estate,» Msye Toussaint ti elabore.

Dapre Msye Toussaint tou levidans ki zot in kolekte i endike ki sa dife ti ganny mete malapropo e alors i pe ganny trete konman en ka arson.

I ti raporte ki ti annan en diskisyon ant en madanm ek son partner, Msye Franchette, avan ki dife ti konmanse.

Sa dife ti malerezman detri 2 lakaz ek 1 parsyelman ki sitie dan en ansyen blok 5 younit dan Corgat Estate.

 

An rezon sa dife trwa fanmir in ganny afekte dan sa lensidan, e i annan ki’n bezwen ganny trete pour sok lopital.

Zofisye relasyon piblik Lazans Servis Tenny Dife ek Sovtaz Msye Jones Madeleine i dir apre ki zot ti’n anrezistre sa lapel ki i annan sa dife anviron 9er, ti pran zot mwens ki 5 minit pour ariv dan sa landrwa e ler zot ti arive sa lakaz ti konpletman anflanm.

De masin ti ganny deplwaye e ti pran Brigad anviron 60 minit pour konpletman tenny sa dife. Brigad ti ganny serten problenm pour tenny sa dife vi ki kouran ti ankor pe sirkile dan lakaz.

«Ti pran nou anviron 60 minit pour met dife anba kontrol, e dapre levidans ki nou’n ranmase i annan en posibilite ki sa dife in ganny mete par ekspre, nou pe tret sa dife konman en ka sispe.»

Serten sa bann viktim ti ganny lasistans sorti kot zot bann vwazen, e osi zot ti nobou dormi kot Maison Football.

En viktim sa lensidan Mario Labiche i dir avek en lazans medya ki i krwar sa dife in ganny met par ekspre.

«Lendi swar mon ti pe asize avek en dalon ek mon manman ler en dimoun [Franchette] ti vini e ti pe konmans fer en ta dezord. Nou ti telefonn lapolis e zot ti dir nou ki zot okipe menm si ti annan en loto park obor kordgard. Apre ki nou ti sorti kot gard [Mont Fleuri], nou’n konmans santi loder lafimen dan lakaz, e dife ti’n fini konmans pran.»

Konman larepons an relasyon avek lakizasyon ki lafors lapolis pa’n fer ase pour ede rezourd sa bagar e evit sa sitiasyon pour deteryore, Msye Toussaint ti dir ki premye kou-d-telefonn ki lapolis ti gannyen pa ti tro kler.

«Ti annan en kou-d-telefonn ki ti antre 5 minit avan ki rapor dife i ganny fer e, pandan sa konversasyon, ti annan bokou komosyon ek tapaz. Sa zofisye pa’n vreman konpran ki pe ganny dir.»

I ti eksplike ki kan serten sa bann dimoun ti desann kordgard pour raport lo sa bann komosyon, lapolis ti reazir vitman e deplway en younit ki ti kot Lopital Sesel.

Msye Toussaint ti osi note ki dife ti’n fini konmanse ler ki lapolis ti ariv lo site e bann masin tenny dife ti pe deza tras larout pour vin tennyen.

Tou-d-fwa lafors lapolis pou fer en kont randi e analiz lo la fason ki sa sitiasyon in deroule, pour vwar si i annan nesesite amelyor efikasite lapolis.

Lanket dan sa ka arson pe ganny fer konzwentman avek lazans servis tenny dife ek sovtaz.

Bann portre ki akonpanny lartik i montre en pe bann dega okazyonnen par sa dife.

 

_DSC9558.jpg

_DSC9549.jpg