Crime Stopper and Service Complaints call 133  | For Emergencies Call 999

Central Police HQVictoria, Mahe

Emergency Only 999

Communique

Communique (181)

Swivan  lanket fer dan ka sa video ki an sirkilasyon lo media sosyal ki demontre en zonm pe ganny tortire, lapolis pe konfirmen ki sa pa enn ant sa 2 peser raporte manke lo “Pti Sirenn”, bato ki tin ganny raporte manke an mer depi Mars avek 3 peser  abor e ganny retrouve komansman sa mwan avek selman enn peser abor.

 Lapolis I deplor bann tel aksyon e alegasyon poste lo rezo sosyal e demann nenport endividi  ki annan serten kontribisyon anver son lanket pour kontakte 2641935. Tou leformasyon I reste konfidansyel.

 Lapolis pe egalman fer resorti ki sa sel peser kin ganny retrouve e ki ansemoman lo rimann koman sispe pour lofans “aledged murder” pou repas ankour merkredi antretan ki lanket dan sa ka I kontinnyen.

Wednesday, 12 June 2019 Communique

Lapolis in raporte ki 6 sispe zonm aze ant 18 a 27 an in ganny anmenn ankour lendi pou lofans koz dimal grav en zonm.

Tou le 6 sispe in ganny large lo serten kondisyon, tel ki zot pa ganny dwar kit pei, pa enterfer avek temwen dan sa ka e menm kosyon larzan. Zot tou zot pou

reaparet devan lakour Merkredi prosen le 19 Zen kot zot ekspekte ganny sarze.

Sa I an relasyon avek lensidan en zonm 25 an ki ti ganny bate kot en laboutik Mont Plaisir sanmdi tar dan lannwit.

Sa zonm ki admit lo ward lopital sesel I sibir plizyer dimal korporel me son kondisyon in ganny dekri koman stab.

Lapolis in raporte ki sa 3 zonm sispe ki ti ganny arête e ti pe rimann depi le 28 Me an koneksyon avek lofans vol an servan vyolans lo en viziter Ris dan distrik Bel Ombre pandan lannwit le 26 pou al lo granmaten le 27 Me in formelman ganny sarze ozordi devan lakour siprenm.

Tou le 3 akize, enn 18 an sorti Au Cap, lot 21 an Vilaz Pascal e pli aze 26 an ki reste Nouvelle Vallee  pe reste lo rimann ziska le 19 Zen zour ki zot pou repas devan Ziz lakour siprenm

Wednesday, 05 June 2019 Communique

 

 

Lapolis avek lotorite prizon pe demann sa prizonnyen trouve dan sa portre, Elvis Athanase aze 25 an pou deswit  rann son lekor avek lotorite konsernen.

 Elvis Athanase in ganny raporte sove prizon Montagne Posee depi tar yer Mardi le 4 Zen e lapolis ek lotorite prizon pe demann nenport endividi kin trouv li oubyen konnen kote i ete pour kontakte kordguard pli pre irzan.

 Elvis Athanase i en zabitan Baie Ste Anne Praslin ki depi Desanm 2013 pe deservi en santans 24 an prizon antou pour plizyer diferan lofans kas lakaz e vole.

 Manm piblik pe ganny  averti ki i en lofans serye pour asiste e kasyet prizonnyen kin sove an detansyon legal.

 

Tuesday, 28 May 2019 Communique

Sa 5 sispe pirat Somalyen ki ti ganny remet avek lotorite Sesel le 26 Avril apre ki zot ti ganny atrape par bato naval Espanyol ki pe partisip dan loperasyon EU NAVFOR  Atalanta in formelman ganny sarze ozordi pour lofans asosye avek Piratri. Enn parmi sa bann sispe ti ganny repatriye Somali an Desanm 2018 swivan on larestasyon an Novanm 2017.

Tou le 5 akize in aprezan ganny remann ziska le 7 Zen zour ki zot pou repas ankour.

 

Apre ki en zonm sispe 21 an sorti Vilaz Pascal ti ganny arête yer granmaten e ganny anmenn ankour plitar pandan lazournen kot in ganny rimann pou lofans vol an servan vyolans, 2 lezot son akonplis, enn zonm 26 an sorti Nouvelle Vallee ek en lot 18 an ki sorti Au Cap in ganny atrape pandan lazournen yer e pas ankour ozordi kot zot  in osi ganny rimann an detansyon lapolis.

 

Sa 3 sispe in ganny konekte avek en ka kot en viziter ris (Russian) ti ganny agrese e ganny vole serten propriyete valer Bel Ombre pandan lannwit dimans pou al lo granmaten yer lendi.

Swivan lanket lapolis I reisi rekiper serten propriyete ki sa 3 sispe tin vole.

Tou le 3 sispe pour aprezan repas ankour le 10 Zen.

Monday, 27 May 2019 Communique

En garson 19 an ki reste Belonie i admit dan younit swen entansif lopital Sesel swivan en aksidan dan zanmerant lekol lendepandans Union Vale ozordi granmaten.

 Aksidan ti ariv apre ki sa garson, ti perdi kontrol loto ki i ti pe dray e tap dan baraz obor semen e apre  tap en miray batiman Laxmanbai. En ggarson 21 an, pasaze dan sa menm loto li in ganny trete apre ganny large.

 Sa lensidan ti ganny raporte avek lapolis ver 2:50 bomaten letan ki sa loto ti pe fer direksyon lavil sorti nor.

 En lanket in komanse dan sa ka.

Lapolis in raporte i i pe fer lanket dan lensidan kot en zonm 33 an ki reste Machabee in mor apre ki in tombe sorti lo en pye dibwa Barbarons letan i ti pe travay.

Dapre rapor sa zonm akonpannyen par 2 lezot koleg ti pe netway lalinny elektrik PUC letan sa lensidan trazik ti arive ver 12:00 ozordi. I ti ganny transporte sant lasante Anse Boileau kot i ti ganny sertifye mor.

Sa lensidan ki ti ganny raporte avek lapolis ver 12:05 in ariv dan zanmerant ex- Indian Ocean Nursery.

Lapolis in raporte ki en madanm ‘Tyekoslovakyenn’ (Czech Republic) in perdi son lavi ozordi boner apremidi an rezilta en aksidan ki ti arive letan ki I ti pe mont bisiklet Grand Anse, La Digue.

 Sa madanm, aze  70an ti ariv Sesel yer le 2 Avril 2019 ansanm avek son msye e zot ti sipoze kit pei le 5 Avril 2019.

 Lapolis in ouver en lanket dan sa aksidan

Swivan travay ki pe ganny fer par lapolis pou retrouv sa 2 garson 14 an e kontak konstan avek zot manman, tou lendikasyon I demontre ki Shane ek Sean Labiche I dan Nor Mahe. I menm annan konfirmasyon serten manm fanmiy e lezot endividi kin fizikman trouv zot dan sa rezyon e dir ki zot paret byen.

Sepandan Lapolis I dir ki sanmdi le 23 Lapolis ti lokaliz Shane ki tin ganny raporte manke depi le 18 sa mwan  e retroun avek li kot lakour son manman me sa garson ti plitar menm zour  re ale e ziska prezan i pakor retrounen. Sean lo son kote depi ki in ale 1 mwan pase I pakor retourn kot lakour.

Malgre ki I annan dimoun ki trouv zot, lapolis pe ankor ennfwa demann Shane ek Sean Labiche pou kontakte zot manman oubyen kordgard pli pre irzan.

Ankor en lot bato I ganny atrape pou lapes ilegal dan lanmer Sesel.

Kaptenn en bato lapes Comorien in pas ankour  yer Merkredi e ganny rimann pou 14 zour tandis ki laranzman pe ganny fer pou repatriasyon 2 son manm lekipaz ki ti ganny arête ansanm avek li pe lapes ilegalman dan lanmer Sesel.

Sa bato lapes anviron 22 pye longer  ti ganny etersepte par bato Patrol Gard Lakot Sesel dan zanmerant Assomption  Lendi le 25 Mars.

Sa kaptenn pou repas ankour le 10 Avril kot i ekspekte ganny sarze.

Lapolis in raporte ki letopsi lo lekor Livio Labaleine 17 an sorti La Gogue in fer yer apremidi e rezilta i konfirmen ki  lakoz son lanmor se  in noye. Rapor lensidan trazik Livio ti ariv Perseveranse dimans tar apremidi

Communiqué Filter

« June 2019 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30