Lapolis in egalman raporte ki sa zonm Roche Caiman ki ti ganny anmenn ankour le 7 Mars e tin ganny rimann koman sispe pou plizyer lofans komet dan rezyon Mont Fleuri ant Zanvye ek boner sa mwan in formelman ganny sarze ozordi pour lofans vol pandan lannwit ( Burglary ), vole, kas lakaz osibyen ki pour lofans trespas kriminel.

Mazistra I osi akord demann lapolis pou sa akize i reste ankor 14 zour lo rimann ziska son prosen aparisyon ankour kot I ekspekte plede.

En zonm 27an sorti Grand Anse Mahe in ganny anmenn ankour ozordi kot in ganny rimann koman sispe dan en ka kas batiman e vole ki ti arive kot Stasyon Petrol Grand Anse Mahe tou resaman. 

Sa sispe ki ti ganny arete yer pou aprezan repas ankour le 28 Mars zour ki i ekspekte ganny sarze.

Lapolis antretan pe kontinnyen avek son lanket.

En zonm 32 an ki reste Anse Aux Pins in ganny anmenn ankour ozordi apremidi kot in ganny rimann koman sispe dan omwen 3 lensidan vol raporte arive kot 3 lakaz dan sa distrik le 15, 16 ek 17 Mars.

Sa sispe ki ti ganny arete ozordi granmaten pou aprezan repas ankour le 4 Avril zour ki i ekspekte ganny sarze.

Lapolis antretan pe kontinnyen avek son lanket.

En garson 16an sorti Eden Village (Cosovo) I ganny rimann an detansyon lapolis apre ki in kas lord e kondisyon ki lakour tin enpoz lo li le 9 Mars 2023 an relasyon avek lensidan Eden Village(Cosovo) le 24 Fevriye 2023 kot en zonm 30an avek en madanm 39an ti gravman ganny blese lo serten parti zot lekor. 

Sa sispe ti ganny trouve yer Dimans le 19 Mars 2023 granmaten par zofisye lapolis kot en lakaz dan en fonksyon Eden Village (Cosovo) apre ki lapolis tin reponn lapel lasistans lo en “scene” kot sa menm sispe ansanm avek lezot son bann koleg tin bles en zonm an rezilta en komosyon. 

Lord lakour ki sa sispe tin kase se I napa dwa konmet okenn lofans pandan letan ki i deor lo laliberte provizwar, en konvrefe ki komans depi 7er diswar ziska 6er bomaten e pou siryn liv lakour kordgard Mont Fleuri 2 fwa par zour.

Mazistra in ordonnen ki sa sispe I ganny garde an detansyon lapolis ziska le 23 Mars 2023 zour ki I ekspekte repas ankour

En zonm 26an sorti Talbo Cascade in ganny transporte lopital Sesel pou swen medikal spesyalize anrezilta dimal ase serye ki in ganny lo serten parti son lekor anrezilta en komosyon kin arive Eden Village (cosovo).

En garson 22an sorti Point Larue in formelman ganny sarze devan lakour mazistra dan 3 ka vol kin arive pandan mwan Mars 2023 dan rezyon Point Larue e Anse Aux Pins.

Mazistra in enpoze serten kondisyon lo sa aprezan akize, parmi I en kosyon larzan 15 mil roupi ki i pann kapab peye ki fer in ganny rimann prizon Montagne Posse ziska le 31 Mars 2023 zour ki I ekspekte repas ankour.

2 etranze I kondannen pou lenportasyon kokain.

En biznesmenn 58 an avek nasyonalite Nizeryen in kondann 30 an prizon yer Zedi apre ki lakour Siprenm I trouv li koupab pour lofans lenportasyon kokain ki en drog kontrole.

Patrick Ikechukwu Uwaoma ki ti pe reste lanmerik ti ganny enterespte par zofisye lapolis ansanm avek zofisye ladwann lo erport eternasyonal Sesel le 20 Novanm 2022 apre ki i tin arive lo en vol sorti Letiopi . Pandan lafouy fer dan son bagaz lo son larive, bann zofisye ti dekouver e sezi en pti pe plis ki 4.5 kilogranm kokain ‘cocaine’. 

En lot zonm kin kondannen pour lofans lenportasyon drog kontrole kokain i Nicaragwen German Augusto, Brook Dixon aze 42an ki ti ganny enterespte par zofisye lapolis ansanm avek zofisye ladwann lo erport eternsayonal Sesel le 4 Oktob 2022 apre ki I tin arive abor en vol sorti Dubai. 

Parey Uwaoma, swivan lafouy fer dan bagaz Brook Dixon, en pti pe plis ki 4 kilogranm kokain ‘ cocaine’ ti ganny dekouver e sezi. 

Sa Nicaragwen 42 an ki dir I pa dan lanplwa in kondann en term 5 an prizon apre ki in korpere okour lanket e tin pled koupab pou sarze mete kont li. Brook Dixon ti kondannen Merkredi.

I egalman annan en lot zonm Seselwa ki pe ganny zize dan sa menm ka.

En garson 21an sorti Perseverance in admit lopital Sesel avek dimal ase serye ki in ganny dan son latet.

Lapolis ti ganny alerte lo sa lensidan yerswar yer 11er 30 diswar apre ki sa garson tin fer rapor konmkwa i tin ganny atake avek en group dimoun dan zanmerant Ex kan gard Mont Fleuri kot zot ti fizikman agres li avek en lobze dan son latet kot in ganny dimal. 

En lanket in komanse dan sa enn ka. Lapolis pe rod sa bann agreser e pe demann okenn dimoun kin temway sa lensidan pou pran kontak avek kordgard Mont Fleuri lo 4288070.

3 pasaze ek en 1 drayver bis Sptc in ganny transporte lopital Anse Royale pou swen medikal swivan en aksidan kin arive Anse Forban kin enplik 2 bis Sptc.

Rapor preliminer ki lapolis in ranmase en bis ti pe fer direksyon Takamaka e lot direksyon Lavil letan ki zot ti fer kolizyon ant kanmarad. Lapolis ti ganny alerte lo sa aksidan ver 4er apremidi e en lanket in komanse dan sa enn ka.

En zonm 35an sorti Beolier in formelman ganny sarze devan lakour Mazistra Anse Royale pou lofans vol.

Sa sispe zonm ti komet sa lofans le 22 Fevriye 2023 dan distrik Au Cap kot I ti antre dan en latablisman touristik e vole. Mazistra in enpoze serten kondisyon lo sa aprezan akize, parmi I en kosyon larzan 25 mil roupi ki i pann kapab peye ki fer in ganny rimann an detansyon lapolis ziska le 27 Mars 2023 zour ki I ekspekte repas ankour.