Kominike
En zonm 29 an sorti Anse Royale in ganny arete, pas atraver bann prosedir legal, e plitar ganny large. Sa i an rapor avek en lofans kot i ti akt dan en fason neglizans, ki ti lakoz en dife pour detri en gran bout veditasyon. Lazans Servis Tenny Dife ek Sovtaz ti bezwen entervenir pour tenny sa dife. Sa lensidan ti ganny raporte avek Lapolis le 20 Out 2025.
Dan en lot ka separe, ki ti ganny raporte avek Lapolis yer apremidi dan distrik Glacis, en zonm 73 an in osi pase atraver bann prosedir legal, e plitar ganny large. Sa osi i konsern en lofans kot en dife ti detri en bout veditasyon akoz aksyon neglizans.
Dan toulede ka, Departman Lanvironnman in pran aksyon lo zot kote e sarz sa 2 endividi avek en lanmann.
I enportan note ki restriksyon pour met dife ti antre an fors depi Lendi le 11 Out 2025, e i ekspekte reste an plas ziska lafen Oktob 2025, sa depan lo kondisyon letan. Nenport dimoun ki met dife pandan sa peryod pe komet en lofans, e i kapab ganny en lanmann ki sorti ant 500 roupi ziska 1,500 roupi.
Departman Lapolis pe lans en lapel avek tou dimoun pour respekte sa restriksyon pour evit lezot lensidan dife. Sa bann aksyon neglizans i kout bokou resours pour kapab met en dife lafore anba kontrol e i kapab anmenn retar dan bann lezot ka kot dimoun ti a bezwen lasistans imedyat.
