Kominike (Swivi)
Lapolis in rikord 7 tyenm ka aksidan fatal pour 2025, kin arive yerswar Roch Caiman, kot en zonm 71an sorti Eden Village in perdi son lavi dan sa aksidan.
En zonm 52an sorti Copolia in ganny arete ozordi bomaten, e en madanm 49an sorti Beau Vallon ki tin ganny arete yerswar, pe ganny deteni koman sispe, dan sa ka pour lofans okazyonn lanmor en endividi par dray dan en fason danzere ou neglizans.
Dapre rapor inisyal ki lapolis in ranmase, sa defen ti pe travers semen, an sortan ver direksyon borlanmer, pour al ver Lekol Plaisance segonder, kot i ti ganny tape avek en transpor ki ti pe fer direksyon ver Lavil, ki ti kontinyen ale san arete, kot en lot transpor ki ti osi pe fer menm direksyon ver lavil, ti mont lo sa defen, kot i ti pri anba transpor.
Lazans Servis Tenny Dife Ek Sovtaz ti entervenir pour lasistans, kot sa defen ti ganny sertifye mor sirplas plitar par patolozis lapolis. En lanket detaye in komanse dan sa enn ka, annatandan rapor rezilta letopsi pour etablir sirkonstans otour lanmor sa zonm.
