Kominike Lapolis

Lapolis pe raporte ki sa zonm ki tin ganny arete koman sispe dan plizyer ka labi seksyel e plizyer lezot lofans kriminel in ganny anmenn ankour ozordi e lakour in akord demann lapolis pour li reste lo rimann antretan ki I kontinnyen avek son lanket

Sa zonm ki tin ganny arete an relasyon avek lensidan kot en madanm ti perdi son lavi Grand Anse Mahe pandan letan gro lapli e linondasyon Vandredi pase  in ganny anmenn ankour ozordi kot in ganny large lo plizyer kondisyon antretan ki lanket dan sa ka I kontinnyen.

En garson 16 an ki reste Pointe Larue in pas devan lakour Mazistra  dan prezans son manman Vandredi le 16 Desanm e mazistra in ordonnen ki I ganny rimann an detansyon lapolis pou li repas ankour le 30 desanm.

Sa garson pe ganny prosekite koman sispe dan 3 diferan ka vole dan transpor. Premye ka ti ariv dan distrik Au Cap le 28 Out, 2yenm le 11 Septanm Pointe Larue e 3yenm ka ti dan Victoria le 3 Desanm.

Lapolis pe egalman raporte ki Kurtis Johnny Marc Sinon in kondannen pour lofans kas lakaz osibyen ki pour vole dan lakaz, 2 lofans komet le 13 Zilyet dan distrik Anse Etoile.

Pou lofans kas lakaz Sinon  in ganny en santans 5 an tandis ki pour vole 2 an prizon e sa 2 term pou mars separeman ki fer 7 an antou. Mazistra in sepandan ordonnen ki letan fer par Sinon lo rimann I ganny dedwir lo son santans.

An relasyon avek ka Sinon kot labwason alkolize avek bizou ti ganny vole e plitar mazorite bann propriyete ganny rekipere swivan lanket ti annan egalman 4 sispe ki ti ganny arete e ganny sarze koman reseler.

Tou le 4 akize in egalman kondannen dan sa ka, me diferans dan zot ka I ki zot santans in ganny sispann.

Sa bann akize i 3 zonm avek en madanm kin kondann ant 8 mwan a 18 mwan avek santans sispann ant 12 mwan a 3 an prizon. Si zanmen zot ganny sarze e ganny trouve koupab avan ki zot term prizon sispann I ekspire zot poun kas sa  bann kondisyon alor zot pour bezwen fer zot santans prizon.

Mazistra ki ti pe ekout sa ka  ti rann zizman ladan le 9 desanm.