Kominike
Brigitte, Jeline Robert aze 31an ek Cindy, Jessica Cousin aze 33an, in kondannen devan Lakour Mazistra, Ile du Port pour lofans Vole dan en landrwa travay. Swivan lanket fer par seksyon krim komersyal ki tonm dan younit krim finansyel (FCIU), ti dekouver ki konmansman le 31 Mars 2021, ziska le 11 Mars 2022, sa de ansyen travayer Labank Brigitte, Jeline Robert ek Cindy, Jessica Cousin ti pe obtenir larzan, lo kont en pansyonner ilegalman, kot en sonm 178mil roupi antou tin ganny vole.
Mazistra in enpoz en santans separe lo Robert ek Cousin, kot sakenn in kondann 2 an prizon, ki’n ganny sispann pou en peryod 3an, avek sakenn en lanmann 94mil roupi ki zot pour bezwen peye avan le 31 Desanm 2025. Mazistra in ordonnen ki en sonm 89mil roupi dan sakenn sa lanmann pour ganny retire e pour al koman en konpansasyon pour sa viktim.
Mazistra in osi averti zot, ki si pandan sa 3an zot komet okenn lofans, ki ganny pini anba en santans prizon, zot pou ganny anmennen devan Lakour e zot santans prizon pour vin aktiv. E si zot pa pey zot kosyon 94mil roupi avan le 31 Desanm 2025 zot pou deservi en term 2an prizon.
