Konpanny “Arrive Alive” I ofisyelman lanse pour lannen 2025- 2026

Komisyoner Lapolis, Msye Ted Barbe, in ofisyelman deklar konpanny “Arrive Alive” ouver pour lannen 2025 ek 2026, pandan en seremoni ki ti ganny organize ozordi bomaten kot Reflex.

Parmi bann envite ki ti prezan ti annan PS pour Homeland Security and Civil Affairs, Madanm Sherly Vandagasamy; PS pour Transpor, Msye Patrick Andre; Zofisye an Sarz Relasyon Piblik pour Lazans Servis Tenny Dife ek Sovtaz (SFRSA), Msye Terrence Arnephey; manm Egzekitiv Lafors Lapolis; bann zofisye lapolis; ansanm avek bann fanmiy ek zanmi bann viktim ki’n perdi zot lavi dan aksidan fatal lo larout piblik.

Pandan sa seremoni, Sou Lenspekter Julinio Nourrice ti prezant en rezimen lo proze “Arrive Alive”, kot i ti fer resorti ki sa konpanny pour deroule ziska Desanm 2026 e pour konpri nef faz ki pour ganny aplike pandan diferan mwan dan lannen 2026. Sa bann faz i enkli dyalog avek bann etidyan dan lekol lo size sekirite lo larout piblik, konpetisyon poster pour evalye nivo konpreansyon bann zanfan lo sekirite lo larout, en revi lo lalwa konsernan laz pour mont scooter ou moter , ki propoze pour sorti 16 an pour vin 18 an. Lezot aktivite dan kad sa konpanny i enkli road block pour ranforsi vizibilite lapolis lo larout piblik pandan bann peryod festivite, osi byen ki tes lalkol pour bann motoris. Bann motoris ki rezilta lalkol i 0% pour ganny zot detay anrezistre dan en sak, e an boner 2026 en tiraz pour ganny fer kot 10 drayver pour ganny rekonpanse. Sa inisyativ i vize pour ankouraz bann motoris pour pa bwar e kondwir, espesyalman pandan sa bann moman festivite.

Sa konpanny “Arrive Alive” in osi demare avek en forum, kot bann zofisye lapolis ek bann fanmiy ki’n perdi en pros dan aksidan fatal ti ganny loportinite pour zwenn ansanm avek Miss Beryl Dodin ek Msye Gerald, pour en sesyon dyalog ek partaz leksperyans.

Dan son ladres, Komisyoner Ted Barbe in fer resorti ki en tel konpanny i vreman enportan pour anmenn en sanzman dirab, pa zis atraver aksyon parey road block, me plis atraver sansibilizasyon ek ledikasyon pour redwir kantite aksidan fatal lo larout. I ti osi lans en lapel spesyal avek bann paran pour pran plis responsabilite pandan sa peryod festivite, sirtou letan bann zanfan i deplase dan lavil kot i annan bokou sirkilasyon trafik.