Central Police Headquarters, Victoria
Mon - Fri: 8.00 am to 4.00 pm.
Emergencies
999.
Crime Sropper
133

Communique

Sispe dan fatal Barbarons I ganny large.

Sa sispe 26 an dan ka fatal Stephane Juliette Barbarons 2 dimans pase in reganny anmenn ankour ozordi kot in ganny large antretan ki lapolis I kontinnyen avek son lanket.

Loperasyon resers lo zil Silwet I arete.

Lapolis pe raporte ki malgre zefor maksimom in ganny mete dan loperasyon pou retrouv Peter Guy Clement, sa britanik 57 an raporte manke Lo Zil Silwet depi le 15 Me zot pann retrouv li e ki yer lendi le 6 Zen dernyen group son zofisye in ofisyelman aret resers. Sepandan lanket dan sa ka I kontinnyen parey in leka dan lezot lensidan  raporte arive dan le pase.

I enportan note ki apard zofisye lapolis, militer, ‘rangers’ e travayer lo Silwet, osi angaze dan sa loperasyon resers pou retrouv Msye Clement ti bato, “drone” e menm elikopter. Lapolis I remersi tou son partener e endividi kin partisip dan sa loperasyon resers kin pour 3 semenn in ganny fer lo later, parlao e otour Silwet.

 

 

Lapolis in anmas lekor Msye Augustin Loze aze 65an sorti Roche caiman.

Lapolis in anmas lekor Msye Augustin Loze aze 65an sorti Roche caiman.
 
Sa i swiv rapor fer ozordi ver 12:10 apremidi apre ki msye Loze tin kit lakour kot i ti pe reste Roche Caiman yer bomaten e i pa tin retournen.
 
Lapolis ti ganny alerte ver 2er 15 apremidi ki lekor Msye Loze tin ganny vwar dan en lanmar dan rezyon Barbarons.Lapolis in komans en lanket dan sa ka annatandan rapor rezilta letopsi pou etablir sirkonstans e lakoz son lanmor.

Kominike Lapolis

Sispe dan fatal Barbarons dimans pase I reste lo rimann.

Rezilta letopsi fer yer Zedi lo lekor Stephane Juliette aze  20 an ki ti mor Barbarons dimans swar apre ganny tape par en loto in demontre ki sete dimal sever resevwar dan son latet ki lakoz son lanmor.

Sa zonm drayver 26 an sorti Beoliere dan distrik Grand Anse Mahe, sispe dan sa ka fatal ki ti deswit apre ganny arete e anmenn ankour son landemen lendi e retournen ankor Mardi ti finalman ganny rimann pour 7 zour Merkredi le 1 Zen lo son 3yenm aparisyon ankour dan lespas 3 zour.

Sa sispe pou aprezan repas ankour le 7 Zen antretan ki lapolis I kontinny son lanket dan sa ka.

 

En travayer Endyen I mor lo sit konstriksyon en lakaz Anse Boileau

En zonm 36 an avek nasyonalite endyen ki travay koman mason avek lakonpannyen “Rojan” in raporte tonmbe sorti lo en “Scaffold” anviron 4 met oter e mor dan zanmerant Cape Ste Marie Anse Boileau ver 12:15 apremidi ozordi. Sa lensidan ti ariv kot en lakaz pe ganny konstri.

Sa zonm ti ganny sertifye mor kot Sant lasante sa distrik kot I tin ganny transporte pour lasistans medikal.

En lanket in komanse dan sa ka.

Kominike Lapolis

Lapolis in raporte ki Msye Leopold Payet ki ti lo rimann depi tar lannen pase  e apre ganny sarze boner sa lannen pour lofans konplote pou an posesyon zarm ek aminisyon osibyen ki pou abiz lotorite son lofis pandan letan ki I ti ansarz lafors defans in ozordi ganny large lo plizyer kondisyon ziska son ka I ganny ekoute.

Sa devlopman I swiv laplikasyon ‘bail’ date le 18 Me fer par son avoka prenon kont son kondisyon lasante. Lezot akize dan ka asosye avek posesyon zarm ek aminisyon I touzour reste lo rimann.

 

Lapolis  in egalman raporte ki en pikup ki ti pe anmenn manze zannimo kot en laferm dan leo Anse Louis in savir anba lao apre ki drayver I dir I ti tann en tapaz kaze anbala letan ti pe desann semen segonder ase anpant pou al kot son laferm.

Lazans servis tenny dife ek sovtaz ti bezwen entervenir pou retir en travayer zonm 65 an sorti Les Cannelles ki tin pri anba sa pikup. Sa zonm kin ganny dimal dan son lebra kote drat e ki ti pe osi konplent douler lo son lekor ti ganny transporte Lopital Anse Royale pour lasistans medikal.

Drayver, en zonm 39 an ki reste Sweet Escot Anse Royale sepandan in sorti dan sa lensidan ki tin kapab trazik  dan sok.

Sa aksidan ti ganny raporte avek lapolis zis avan midi ozordi.

Lapolis pe fer lanket dan sa ka.

Kominike Lapolis

Toule sispe I dan lanmor Shirleytine

Lapolis pe raporte ki sa zonm Takamaka avek sa fiy 18 an sorti Anse Royale, sispe dan lanmor Shirleytine Ernesta ki son lekor ti ganny dekouver dan leo Bougainville Merkredi le 4 Me in formelman ganny sarze devan lakour Siprenm ozordi apremidi pour lofans asosye avek mert.

Sa zonm in ganny sarze pou konplote e osi pou touy Shirleytine 21 an sorti Mont Plaisir tandis ki sa fiy 18 an ki ti ganny arete le 5 Me aswar li in ganny sarze pou lofans konplote e asiste pou komet lofans mert.

Tou le 2 akize kin aprezan ganny rimann prizon pou repas ankour le 14 Zen.

 

Sispe dan ka fatal Barbarons I ankor an detansyon.

Lapolis in raporte ki sa zonm 26 an e nonpa 28 an, drayver en loto ki ti ganny arete e detenir koman sispe dan aksidan fatal Stephane Juliette dimans swar Barbarons in ganny anmenn ankour yer apremidi, ganny retenir e reaparet ankor ankour ozordi bomaten kot lakour in ordonnen pour detenir li ankor ziska demen pou determinen si I pou kontinnyen reste lo rimann.

Sa ki kler dan sa fatal  sepandan I ki Julienne tin ganny tape lo semen par loto ki ti pe ganny dray par sa zonm 26 an. Sa fatal ti ariv dan zanmerant laboutik ek Flat sitye obor semen Barbarons.

O moman aksidan sa drayver sispe ki ti pe fer direksyon Grand Anse sorti bor Anse Boileau I dir I ti pe “overtake” en loto ki tin park lo kote lanmer ler sa garson sorti kot sa koto ti koup semen en sel kou an gran.

Lanket dan sa ka I kontinnyen.

 

2 Viktim lofans koz dimal grav I tir ka devan lakour  kont zot agreser.

Lapolis in egalman raporte sa zonm fermye 31 an ki reste Cote D’or Praslin e ki ti lo rimann depi le 19 Me apre ki I tin ganny sarze devan lakour Mazistra pour lofans koz dimal grav e pour lagresyon fizik lo 2 son viktim in ozordi repas ankour kot in ganny large san kondisyon.

Sa developman in vin apre ki son 2 viktim in anba serman devan mazistra retir sa 2 ka kont li.

Kominike Lapolis

Lapolis in raporte ki Vandredi le 27 Me, Patron lo en bato lapes Sri lanken in formelman ganny sarze devan lakour Siprenm pour lofans lapes dan lanmer Sesel san en laysens e in ganny rimann Mont Posee pou 14 zour.

 5 manm lekipaz ki ti abor letan sa bato apele LAKPRIYA 12 ti ganny entersepte dan lanmer sesel le 11 Me in ganny large san kondisyon e laranzman pe fer pou zot ganny deporte dan zot pei.

 

Sa 6 Sri lanken ti ganny arete le 12 Me par lapolis apre ki zot ti ganny eskorte Mahe par zofisye gard lakot Sesel e ganny remet avek lotorite Lapes (SFA).

Premye aparisyon sa bann sispe ankour ti le 13 Me kot zot tou tin ganny rimann pou 14 zour.

 

 En  zonm 28 an avek en lot 26 an ki reste La Passe La Digue in formelman ganny sarze devan lakour Mazistra ozordi bomaten pou lofans antre dan lakaz e vole arive tou resaman lo La Digue.

Mazistra in enpoz serten kondisyon lo zot pou liberte provwar ki parmi I en kosyon 8,000 roupi ki sakenn I bezwen peye sinon zot pou kontinnyen reste lo rimann prizon Montagne Posee kot zot aktyelman ete. 

Stephane Juliette I perdi son lavi dan aksidan fatal Barbarons.

En zonm 28 an ki reste Beoliere in ganny arete e pe ganny detenir koman sispe dan aksidan fatal kot Stehane Juliette, en garson 20 an sorti Grand Anse Mahe ti mor yer swar dan sou distrik Barbarons.

Juliette ti ganny sertifye mor Sant lasante Anse Boileau kot I tin ganny transporte pou lasistans medikal. Tes lalkol fer lo drayver ti parlo limit preskri par lalwa.

Sa fatal ki lapolis pe fer lanket pou etabli sirkonstans ekzakt ki mannyer narive ti ganny raporte ver 8:10 diswar. Sa I 5yenm fatal rikorde pour sa lannen.

Kominike Lapolis

Lapolis in raporte ki Christopher Antoine Lesperance, en zournalye 34 an ki reste Cote D’or Praslin in ozordi bomaten kondann 18 mwan prizon pou lofans pran larzan lo fo preteks e osi pou  fer komers sans en laysens. Lesperance ti komet sa 2 lofans lo lans Cote D’or Mardi le 24 Me kont en viziter Alman.

 Lesperance tin ganny anmenn ankour yer Merkredi e ganny rimann pou li retournen ozordi apre ki mazistra tin akord lapolis zis sa zour pour konplet lanket dan sa ka.

Ozordi bomaten letan Lesperance in reganny anmenn ankour in formelman ganny sarze e in pled koupab pou lofans komet e Mazistra in enpoz sa santans 18 mwan prizon lo li.

 I enportan note ki sa menm Lesperance fek sorti prizon le 7 Me kot in fer 2 mwan pour menm kalite lofans.

2 Ezipsyen I ganny arete koman sispe pour lofans vol.

Lapolis in arete e pe detenir en zonm 29 an ek en madanm 36 an ki annan nasyonalite Ezipsyen swivan lanket ki I pe fer an relasyon avek 2 lensidan vol ki zot in sispekte enplike ladan kot 2 biro lesanz deviz etranzer pandan lazournen yer Mardi.

Premye lensidan ti raporte arive ver 2:40 apremidi dan distrik Beau Vallon kot 11,000 roupi Sesel ek 5,830 ero in ganny vole, tandis ki  vol anviron 1,200 ero kot en lot biro desanz pou menm lakonpannyen ti raporte kord gard  Anse Royale ver 5:50 apremidi.

Sa 2 ezypsyen ti ganny arete kot en apartman dan distrik Mont Fleuri tar yer swar kot lapolis ti sezi dan zot posesyon en gro sonm larzan dan diferan denomination e pou diferan pei, sa ti enkli liv sterlen, dolar ameriken, roupi sesel, ero   e lezot.

Sa 2 sispe in ganny anmenn ankour ozordi apremidi kot zot in ganny rimann pou14 zour.

Lapolis pe antretan kontinnyen avek lanket dan zot ka.

About

The police force in the Seychelles is a national body which falls under the control of the National Commissioner of Police, who is appointed by the President subject to the approval of the National Assembly....

Contacts

Police Headquarters, P.O Box 46, Victoria, Mahe, Seychelles

Email us on:
info@police.gov.sc

Contact
Phone: 4288000


Privacy Policy

All press release and communique on this website is copyrighted content from the Seychelles Nation, Today newspaper and The Seychelles Police force.

Cookie Policy →