En zonm 44an sorti dan distrik Anse Aux Pins in formelman ganny sarze devan lakour mazistra ozordi pou lofans kas lakaz e vole, e pou vole dan en lakaz  Fore Noire dan distrik Mont Fleuri le 13 Oktob 2022.

Mazistra tin enpoz serten kondisyon lo sa akize tel ki en kosyon 8mil roupi ki I ti pou bezwen peye pou son laliberte provizwar, sinny  liv lakour 2 fwa par semenn kot kordgard Anse Aux Pins e pou pa ganny sarze pou okenn lofans pandan letan ki I deor lo laliberte provizwar. Sa akize pann reisi akord demann lakour ki fer I aprezan ganny riman.

Rapor preliminer ki lapolis in ranmase sa drayver bis en zonm 44an sorti Mont Buxton ki ti pe fer larout  Union Vale. Sa sispe zonm aze 55an sorti Mont Buxton tin ganny demande par drayver bis pou debarke an relasyon avek en problenm konsernan peyman tiket.

Pandan ki i ti pe debarke, sa sispe ti bles sa drayver deryer son ledo avek en kouto ki ti dan son posesyon apre taye. En group zofisye lapolis ki ti deza dan sa zanmerant ti temway sa lensidan kot zot ti reisi aret sa sispe sirplas. Sa drayver bis ti ganny transporte lopital Sesel pou swen medikal.

Kelvin Wirtz aze 32an sorti Rochon in yer formelman ganny sarze devan lakour Mazistra Perseverance pou lofans vol ki ti ganny raporte avek lapolis le 27 Oktob 2022,dan zanmerant Rochon.  Mazistra ti enpoz serten kondisyon lo sa akize e en lanmann 3mil roupi ki i ti pou bezwen peye pou son laliberte provizwar.Wirtz pann kapab akord demann lakour kot in ganny rimann prizon Montagne Posse ziska ler I kapab pey sa sonm larzan.

Dan en lot ka separe,

Ronny Domingue aze 42an sorti Les Mamelles in formelman ganny sarze devan lakour Mazistra Perseverance yer dan 3 ka.

Sa I Kas lakaz e vole, trespas kriminel apre vol dan lakaz. Mazistra ti enpoz serten kondisyon lo sa aprezan akize  pou son liberte provizwar kot I ti pou bezwen pey en sonm 10mil dan sakenn sa bann ka ki fer en sonm 30 mil roupi an total, 3 dimoun koman garanti ki ti pou bezwen pey en sonm 10 mil roupi sakenn dan sak ka ki fer en sonm 30 mil roupi, raport kot kordgard Mont Fleuri 2 fwa par semenn pou vin sinny liv lakour, pa repet okenn lofans pandan letan ki I lo liberte provizwar e pou pa enterfer avek temwen dan sa bann ka. Domingue pann reisi satisfer demann lakour ki fer I aprezann ganny riman andetansyon servis prizon ziska ler I kapab akord demann lakour.

Swivan en loperasyon konzwent par gard lakot Sesel e Lapolis Lamarin en patron bato aze 46an sorti Cascade e son 2 lekipaz sa I en garson 19an e lot 24an toulde sorti dan Nor Mahe ti ganny arete apre ki lafouy tinn ganny fer par bann zofisye lo sa bato. En gran kantite  “ prezimen lavyann torti ” ti ganny dekouver abor sa bato. Bann lazans konsernen enkli Minister Lanvironnman ti ganny alerte lo sa dekouvert. Sa bann “ prezimen lavyann torti ” in ganny sezi. Sa bato enkli son bann manm lekipaz abor ti ganny eskorte par gard lakot Sesel e lapolis Lamarine pou destinasyon Mahe. Swivan analisis preliminer lo sa bann lavyann in konfirmen ki sa I lavyann torti e estimen pez enpe plis ki 100 kilo granm.

Sa ka ti ganny raporte arive Sanmdi le 12 Novanm 2022 dan zanmerant Zil Alphonse.

Toulede 3 sispe in ganny anmenn ankour ozordi bomaten pou lofans anposesyon lavyann torti ilegalman. Mazistra in larg sa bann sispe lo serten kondisyon tel ki en pey en lanmann 8 mil roupi sakenn, prodwir 2 dimoun koman garanti pou en sonm 100 mil roupi, remet zot paspor avek lakour, raport kordgard Santral 3 fwa par semenn, en restriksyon mouvman ki komans aparti 7er diswar ziska landmen 6er 30 bomaten e zot pou napa dwa kit Mahe. Sa bann sispe pou re pas ankour le 29 Novanm 2022.

En zonm 32an sorti Point Conan ki travay koman en  “skipper ” in ganny arete tar yerswar an koneksyon avek en lensidan lo lans Beau Vallon.

Lapolis ti ganny alerte lo sa lensiden ver 6er 50 yerswar apre ki en viziter madanm avek Nasyonalite Larisi ki ti lo lans Beau Vallon dan zanmerant lotel Savoy ti ganny tape avek en jetski. In etablir ki omoman sa aksidan sa sispe ki ti operater sa jetski ti pe fer vites e bann akt neglizans dan landwa kin ganny dezinnyen koman “swimming area”. Lensidan ti ariv letan ki operater sa jetski ti perdi kontrol son veikil ki pe fer direksyon ver lans tonm dan lanmer anrezilta sa jetski ti tap sa viziter ki ti lo lans.

En zofisye lenstrikter premye swen pou lapolis ki ti administre premye swen e stabliz sa viktim sirplas avan ganny met dan lanmen zofisye lasante kot i ti ganny transporte par lanbilans kot lopital Sesel kot I ankor admit ziska prezan.

Lanket I deza an progre dan sa ka e lapolis pe fer prosedir pou ki sa sispe I ganny prosekite devan lakour pou lofans ki in konmet.

Lapolis pe raporte ki en zonm 60 an avek Nasyonalite Olande in prezimen noye dan lanmer Grand Anse La Digue ozordi bomaten. Sa zonm ki ti lo vakans ti ariv Sesel le 18 Oktob 2022 e i ti espekte kit pei demen le 25 Oktob. Sa lensidan ti ganny raporte avek kordgard La Digue ver 11er 05 Apremidi.

En lanket in konmanse dan sa ka antretan ki lapolis i esper rezilta Letopsi pou determin ekzakt lakoz son lanmor.

En Zonm 37 an, nasyonalite Nigerien, ki ti ariv Sesel lo vol Etiopian Airline le 4 Oktob 2022 lo apremidi in ganny formelman sarze pour lofans lenportasyon en drog kontrole. 

Lapolis i raporte ki letan sa zonm ti ariv lo Airport Sesel, I ti pas dan scan e dan son lekor ti montre ki I tinn anval bann lobze. I ti ganny kestyonen apre ki I ti pe montre en bann siny enkonfortab. I ti ganny anmenen Lopital Sesel kot I ti ganny sans sove avek zofisye lapolis dan direksyon Botanic, kot apre I ti ganny arete. Lapolis ti retourn avek li Lopital e I ti pas dan X-Ray e ankor ti montre ki ti annan plizyer lobze dan son lekor. I ti ganny anmenen kot stayon lapolis e apre son larestasyon i ti (excreted) 93 kapsil ki ti konteni cocaine, e sa ti en total 1kilo 892 gram.

Dan en lot ka separe

En garson 28an sorti Bougainville in ganny arete e pe detenir pou lofans kiltivasyon drog kontrole, presizeman kanabis.

Sa I anrezilta lafouy ki en group zofisye lapolis tin fer lo propriyete kot son lakour dan leo Bougainville 

kot serten kantite pye drog ti ganny dekouver deryer en store.

Lapolis in komans en lanket dan sa ka.

Lapolis in komans lanket dan en ka aksidan fatal ki ti ganny raporte ver 4er 45 ozordi bomaten arive dan zanmerant Amitie Praslin pa lwen avek Airport. Viktim sa aksidan i Heddy Esther 31an kin mor annarivan lopital Baie St Anne ek son ser aze 21 kin bezwen ganny transporte lopital Sesel pou swen medikal pli spesyalize.

Zofisye lazans servis tenny dife ek sovtaz ti bezwen reponn lapel pou retir sa garson ek son ser ki tin pri dan loto apre ki sa transpor tin tap avek en pye dibwa e savire. Lapolis avek zofisye medikal ti osi reponn lapel lo sa scene. 

Dapre rapor inisyal o moman sa aksidan sa transpor ti pe fer direksyon Amitie .Sa i fer 13yenm ka fatal ki lapolis i rikorde en lanket in komanse dan sa enn ka.

Diferan younit e seksyon dan lapolis ti zwenn ansanm dan en loperasyon spesyal kin fer osi yer dan rezyon Point Aux Sel, Anse Royale, Mont Plasir, Les Canelles, Quatre Borne, Takamaka, Anse Gaulette Baie Lazare, Anse Boileau, Grand Anse Mahe, Port Launay e Port Glaud

Sa loperasyon in target plizyer kalite lofans ki pe arive  dan sa bann landwa kot aktivite ilegal pe ganny fer e pou osi asir sekirite lo larout piblik. Dan sa bann loperasyon lapolis in osi fer lafouy lo plizyer dimoun,  ghetto e dan bann transpor plizyer dimoun in ganny arete pou sa bann lofans swivan.

* An posesyon drog ilegal

*Konsonmasyon lalkol dan landwa piblik

*konsonmasyon lalkol dan transpor lo larout piblik

E osi serten sispe ki ti ganny bezwen dan sertan ka in ganny arete.

Lapolis pou kontinyelman ranforsi son prezan dan sa bann landwa a nenport moman pou fer sir ki lord i ganny mete e ki kominote i santi zot pli an sekirite.

Manm piblik pe ganny ankouraze pou touzour raport bann aktivite ilegal e kriminel ki pe arive dan zot kominote atrave bann platform lapolis oubyen kontakte 133 nou lanir konfidansyel.

Diferan younit e seksyon dan lapolis ti zwenn ansanm dan en loperasyon spesyal kin fer yer dan rezyon Perseverance, Anse Etoile, La Gogue, Maldives, La Retrait, North East Point, Glacis, Beau Vallon, Belombre, St Louis e rezyon lavil.

Sa loperasyon in target plizyer kalite lofans ki pe arive dan sa bann landwa kot aktivite ilegal pe ganny fer e pou osi asir sekirite lo larout piblik. Dan sa bann loperasyon lapolis in osi fer lafouy lo plizyer dimoun, dan serten lakaz, ghetto e dan bann transpor plizyer dimoun in ganny arete pou sa bann lofans swivan.

* An posesyon drog ilegal

*An posesyon serten zouti ofansiv

*Enterfer avek louvraz lapolis

* Dray anba lenflians lalkol ki parlao limit ki lalwa i preskir 35ug/100ml

*Konsonmasyon lalkol dan landwa piblik

*konsonmasyon lalkol dan transpor lo larout piblik

*Servi en transpor lo larout piblik san en lasirans e patant ki valid

*Mont bisiklet lo larout piblik san en patant

E osi serten sispe ki ti ganny bezwen dan sertan ka in ganny arete.

Lapolis I oule lans lapel avek manm piblik ki i en lofans konsonm lalkol dan landwa piblik espesyalman bann lenfrastriktir parey Bazar, Bus stop sirtou dan rezyon Belombre kot bokou sa bann aktivite pe ganny deroule koman en routin. Lapolis pou kontinyelman ranforsi son prezan dan sa bann landwa a nenport moman pou fer sir ki lord i ganny mete e ki kominote i santi zot pli an sekirite.

Manm piblik pe ganny ankouraze pou touzour raport bann aktivite ilegal e kriminel ki pe arive dan zot kominote atrave bann platform lapolis oubyen kontakte 133 nou lanir konfidansyel.