En garson 21an sorti Perseverance in admit lopital Sesel avek dimal ase serye ki in ganny dan son latet.

Lapolis ti ganny alerte lo sa lensidan yerswar yer 11er 30 diswar apre ki sa garson tin fer rapor konmkwa i tin ganny atake avek en group dimoun dan zanmerant Ex kan gard Mont Fleuri kot zot ti fizikman agres li avek en lobze dan son latet kot in ganny dimal. 

En lanket in komanse dan sa enn ka. Lapolis pe rod sa bann agreser e pe demann okenn dimoun kin temway sa lensidan pou pran kontak avek kordgard Mont Fleuri lo 4288070.

3 pasaze ek en 1 drayver bis Sptc in ganny transporte lopital Anse Royale pou swen medikal swivan en aksidan kin arive Anse Forban kin enplik 2 bis Sptc.

Rapor preliminer ki lapolis in ranmase en bis ti pe fer direksyon Takamaka e lot direksyon Lavil letan ki zot ti fer kolizyon ant kanmarad. Lapolis ti ganny alerte lo sa aksidan ver 4er apremidi e en lanket in komanse dan sa enn ka.

En zonm 35an sorti Beolier in formelman ganny sarze devan lakour Mazistra Anse Royale pou lofans vol.

Sa sispe zonm ti komet sa lofans le 22 Fevriye 2023 dan distrik Au Cap kot I ti antre dan en latablisman touristik e vole. Mazistra in enpoze serten kondisyon lo sa aprezan akize, parmi I en kosyon larzan 25 mil roupi ki i pann kapab peye ki fer in ganny rimann an detansyon lapolis ziska le 27 Mars 2023 zour ki I ekspekte repas ankour.

 En zonm 44 an sorti Petit Paris in prezimen pann dan son landwa travay kot en " Bakery " Providans dan zone 20.

Lekor sa zonm apele Steve Uzice ti ganny dekouver par en zofisye lapolis ver 2er 38 apremidi. Sete enn son kliyan ki pa ti pe ganny kontak avek li ki ti enform son manm fanmiy lo sa devlopman e lafanmiy ti demann lasistans lapolis.

Lapolis in komans en lanket pou sey determin sirkonstans otour sa lanmor annatandan rezilta letopsi.

En garson 18an sorti St Louis i ganny sove dan lanmer Grand Anse Mahe.

Lapolis ti ganny alerte lo sa lensidan ver 1er 30 apremidi ki ti annan en garson andetres dan lanmer Grand Anse Mahe. Rapor preliminer ki lapolis i ranmase sa garson ti dan delo sale avek en group son bann zanmi letan ki i enform zot ki i pe ganny difikilte pou naze. Deswit avek lasistans son bann zanmi e dimoun ki ti lo lans a sa letan ti asiste pou retir sa garson dan delo sale e remet dan lanmen bann zofisye medikal kot in ganny anmennen Sant lasante Anse Boileau pou swen dirzans.

En zonm 24an sorti Les Canelles in formaleman ganny sarze devan lakour Mazistra Anse Royale ozordi pou lofans agrezyon fizik e koz dimal lo en miner ek en adilt. 

Senpleman Mazistra in enpoz serten kondisyon lo sa aprezan akize pou son libert provizwar ki parmi I en kosyon larzan 15,000 roupi ki I pann kapab peye alor in ganny rimann prizon Montagne Posse ziska le 24 Mars 2023 zour ki I ekspekte repas ankour.

 zonm 32 an sorti Mont Plezir ki tin ganny arete yer koman sispe dan lensidan bate e koz dimal serye en garson 21an sorti Les Cannelles in ganny anmenn ankour ozordi kot in ganny rimann pou repas ankour le 23 Mars.

Antretan lanket dan sa ka I kontinnyen.

In konfirmen ki i annan en aksidan

Takamaka kin enplik en moter ek en loto.

En garson 25an in ganny transporte lopital Anse Royale pou swen medikal dirzans.

3 zofisye lapolis i kondann 5an prizon.

Archille Agathine aze 28 an ki reste Anse Etoile, Julious Zialor 24 an sorti St Louis ek Jean Paul Marie 20 an Le Niole in kondannen apre ki zot in ganny trouve koupab pou lofans konplo pour komet vol osibyen ki pou lofans kas batiman e vole.

Pour konplote toule 3 akize in ganny en santans 3 an prizon tandis ki pour kas batiman zot in sakenn ganny e term 5 an. Ziz ki ti pe ekout sa ka in ordonnen ki zot santans I mars ansanm ki vedir zot total santans i 5 an prizon.

Sa 3 zofisye lapolis ki ti komet sa bann lofans pandan lannwit le 9 ek granmaten le 10 Zanvye 2021 dan distrik Anse Etoile in osi ganny 6 mwan ki zot in pase lo rimann dedwir lo sa term 5 an.

En zonm 32an sorti Anse Royale in ganny arete an koneksyon avek en lensidan.

En garson 21 an ki reste Les Cannelles i admit lopital Sesel swivan dimal serye ki in gannyen lo serten parti son lekor apre ki in ganny bate avek sa ki i dir i en Baseball bat. En zonm sispe aze 32 an sorti Mont Plaisir in ganny arete e pe ganny detenir antretan ki lapolis i fer lanket dan sa ka. Sa lensidan kin ariv ozordi bomaten ti raporte avek lapolis ver 2er apremidi.