Rohnny, Christian Baptiste aze 32an, ki travay koman en zournalye sorti Perseverance. In formelman ganny sarze devan Lakour Mazistra dan en ka kas lakaz e andomaz propriyete.

Mazistra ki ti pe ekout sa ka, in larg Baptiste lo sa bann kondisyon swivan; pou sinny en "Bail Bond" 10mil roupi pou asir son prezans devan Lakour a sakfwa son ka pe ganny ekoute, en kouvrefe depi 6er 30 diswar ziska 6er 30 bomaten, pou pa komet okenn lofans similer pandan letan ki I deor lo laliberte provizwar.

Departman Lapolis

Gervaise Croise aze 28an, ki en Peser sorti dan distrik Mont Buxton, ki tin formelman ganny sarze devan Lakour Siprenm semenn pase e ganny rimann, andetansyon lapolis. In yer bomaten repas devan Lakour Siprenm ansanm avek lot sispe dan sa ka, Keddy Agnes aze 31an sorti Mont Plasir dan distrik Anse Royale ki travay koman en zofisye Servis Piblik. Keddy Agnes In aprezan formelman ganny sarze devan Lakour Siprenm pour lofans koz dimal grav en endividi.

Ziz Lakour Siprenm, ki ti pe ekout sa ka in larg Gervaise Croise ek Keddy Agnes, lo sa bann kondisyon swivan; kot zot tou le de pour bezwen pey en total 100mil roupi kosyon pour zot laliberte provizwar sakenn, tou le de pou bezwen sinny en “ Bail Bond” 80 mil roupi sakenn, pou remet zot paspor ek bann dokiman vwayaz avek Lakour, pou raport dan en kordgard pli pros pou sinny Liv Lakour 2 fwa par semenn, pou pa enterfer avek temwen dan sa ka, en kouvrefe depi 6er diswar ziska 6er bomaten, pou pa apros 10 met avek konplenan dan sa ka. Ziz in osi fer en lord pour ki Gervais, pa ganny dwa pas dan distrik Point Larue e Anse Boileau ziska ki sa ka I fini ganny ekoute.

Gervaise Croise pann reisi akord demann Lakour pou pey sa kosyon 100mil roupi ki fer, I aprezan ganny rimann Prizon Montagne Posse ziska ki I kapab fer sa peyman, si I ariv peye. I pou ganny large e I pou bezwen sivre sa bann kondisyon ki Ziz Lakour Siprenm in enpoz lo li, tandis ki Keddy Agnes li in fini pey son kosyon 100mil roupi.

Lapolis ti ganny alerte lo sa lensidan le 10 Novanm 2024, ver 8er 20 diswar ki tin ariv kot en Letablisman diverstisman dan rezyon Anse Royale.

Departman Lapolis

2 zonm enn aze 33an e lot 38 an, tou le de sorti dan distrik Anse Aux Pins, in ganny rimann 14 zour andetansyon Lapolis koman sispe dan en ka vol, kot plizyer bizou lor in ganny raporte vole dan en lakaz Turtle Bay, Au Cap. Estimen en valer en ti pe plis ki 150 mil roupi. Dan sa ka lapolis in reisi rekiper mazorite sa bann propriyete ki tin ganny raporte vole.

Sa I dan ka kot, le 23 Novanm 2024 dan ver 3er 23 bomaten, apre ki bann zofisye lapolis sorti Stasyon Anse Aux Pins, ki ti lo patrol ti apersevwar 3 German Shepherd dan zanmerant Reef Holiday Home Apartment pe vir vire lo semen dan sa zanmerant, kot sa bann zofisye ki anmas zot, e met zot dan en landwa sekirize, kot plitar bomaten Lapolis ti resevwar en rapor, ki en lakaz tin ganny kase dan zanmerant Turtle Bay, Au Cap, e sa 3 German Shepherd ti pou sa konplenan dan sa ka.

Departman Lapolis

Seebert Bonne aze 60an, ki pa dan en lanplwa sorti Grand Anse Mahe. In formelman ganny sarze devan Lakour Mazistra Anse Royale dan en ka vol.

Mazsitra, ki ti pe ekout sa ka in larg Bonne lo sa bann kondisyon swivan; pou pey en kosyon 9 mil 500 roupi avan le 10 Desanm 2024, sa i pour sekiriz son kondisyon laliberte provizwar, pour sinny Liv Lakour dan kordgard Anse Boileau 2 fwa par semenn, e pou pa enterfer avek temwen dan sa ka.

Seebert Bonne, ti komet sa lofans le 14 Novanm 2024 ver 12:21 apremidi lo lans Grand Anse Mahe, kot I ti vol sak en viziter ki ladan ti kontenir plizyer propriyete personnel tel ki larzan, telefonn, kart banker. Zofisye Lapolis ki tin reponn lapel pou lasistans ti reisi aret sa sispe menm zour, e mazorite propriyete ki tin ganny raporte vole ti ganny rekipere dan posesyon sa akize.

Departman Lapolis

Prakash Chetty aze 35an, ki en biznesmenn sorti Plaisance in formelman ganny sarze devan Lakour Mazistra dan 2 ka. Sa I pou lofans menas an servan vyolans ek lagresyon fizik lo en endividi.

Mazistra ki ti pe ekout sa ka, in larg sa aprezan akize san okenn kondisyon. Sa ka pou repas devan Lakour Mazistra le 6 Desanm 2024.

Departman Lapolis

Dick Volcere aze 38an sorti Grand Anse, Praslin ki ti lo rimann andetansyon lapolis koman en sispe dan ka, ki lapolis ti fer lanket ladan pour lofans Lesey pou komet Mert. In aprezan formelman ganny sarze devan Lakour Siprenm ozordi bomaten pour sa bann lofans swivan; lentansyon pou koz dimal grav en endividi, koz dimal grav en endividi, okazyonn lagresyon fizik lo en endividi e vole.

Volcere, ti komet sa bann lofans le 14 Novanm 2024 ver 1er 20 kot en lakaz dan Tamatave Estate, Praslin. Lapolis atraver prosekisyon ti anmenn en mosyon pour demann Lakour, ki sa aprezan akize I ganny garde lo rimann pou ankor 14 zour, Ziz ki ti pe ekout sa ka, ti la ordonnen ki sa akize I ganny garde lo rimann Prizon Montagne Posse ziska le 11 Desanm 2024, zour ki I ekspekte repas devan Lakour.

Departman Lapolis

En zonm 38an sorti Grand Anse, Praslin in ganny rimann andetansyon Lapolis pour 14 zour. Sa i koman sispe dan ka ki lapolis pe fer lanket ladan, pour lofans Lesey pou komet Mert, koz dimal grav en endividi e vole.

Lapolis ti ganny alerte lo sa lensidan, le 14 Novanm 2024 ver 1er 20 pou lasistans kot en lakaz dan Tamatave Estate, Praslin.

Departman Lapolis.

Mark Bertin aze 36an ki en Peser sorti Roche Caiman, Eden Village (Kosovo). In formelman ganny sarze devan Lakour Mazistra dan 3 ka pour lofans relye ek vol.

Mazistra ki ti pe ekout sa ka, in larg Bertin lo sa bann kondisyon swivan; kot I pou bezwen pey en total 10 mil roupi kosyon pour son laliberte provizwar, sa I pou dan toule 3 ka, e lezot kondisyon ki Mazistra in osi enpoz lo li, I pou pa enterfer avek temwen dan sa bann ka, pou pa komet ou ganny sarze avek okenn lofans similer, pou sinny Liv lakour dan kordgard Mont Fleuri toule Vandredi.

Mark Bertin pann reisi akord demann Lakour dan toule 3 ka, pou pey son konsyon. I aprezan ganny rimann ankor 14 zour andetasnyon lapolis. Si I arive pey sa kosyon 10 mil roupi I pou ganny large e I pou bezwen sivre sa bann kondisyon ki Lakour in enpoz lo li.

Departman Lapolis

Lapolis in komans en lanket detaye, dan en lensidan kin ganny raporte ozordi granmaten ver 5er 58, arive dan rezyon Beau Vallon dan kontour Laflit, kot en transpor ki ti pe fer direksyon Beau Vallon, ti fer kolizyon avek en transpor lapolis ki ti lo patrol ki ti pe fer direksyon ver Pascal Village.

Anrezilta sa aksidan sa drayver pann arete e in kontinyen ale, kot plitar lapolis in entersepte sa transpor dan rezyon Anse Mazor ki tin andomaze, kot drayver sa transpor ti ganny sans taye, 1 parmi sa 2 pasaze ki ti dan sa transpor. In ganny transporte kot Sant Lasante Larivyer Anglez pou swen medikal dirzans anrezilta dimal ki I tin resevwar lo en parti son lekor. Dapre rapor ki lapolis in resevwar sa transpor in preziman ganny vole dan rezyon Mont Fleuri.

Departman Lapolis