Jean-Yves, Andy Reginald aze 26an sorti Mont Fleuri, in kondannen devan Lakour Mazistra dan 2 ka. Sa i pour lofans andomaz propriyete, ki I ti komet le 4 Oktob 2024, dan distrik Mont Fleuri, e Perseverance.

Mazistra in kondann Reginald 6 mwan Prizon dan premy ka, avek en lanmann 6mil roupi, kot 3mil 70 roupi ladan pour al koman en konpansasyon pour sa viktim. Mazistra in ordonnen ki son term prizon I ganny sispann pou en peryod 2an, Mazistra in avedir sa kondannen, ki si I komet okenn lofans similer, son term Prizon pour vin aktiv.

Dan dezyenm ka Reginald, in kondann 4mwan Prizon, avek en lanmann 7mil roupi, ki ladan en sonm 3mil roupi pour al koman en konpansasyon pour sa viktim.  Mazistra in osi avedir sa kondannen ki si I komet okenn lofans similer, son term Prizon pour vin aktiv.

Reginald ti komet sa lofans andeor Stasyon Lapolis Mont Fleuri, swivan en komosyon, e Perseverance kot lakour enn son fanmiy, kot dan tou le 2 ka, I ti andomaz vit transpor sa 2 konplenan.

Departman Lapolis pe lans en lapel avek manm piblik an zeneral, pou pran plis responsabilite ek prekosyon lo larout piblik pandan bann aktivite ki ganny organize espesyalman pour eleksyon ki pe vini.

Sa bann prekosyon I konm swivan:

• Pa bezwen asiz lo bor pick up oswa lo laport loto ler zot dan bann aktivite parey motorcade. Asiz byen anndan e fer sir laport I ferm byen.

• Evite danse lo larout piblik e fer okenn nwizans ler zot sorti bann akitivte politik, akoz sa I koz problenm avek mouvman trafik e I kapab koz danze pou zot prop lekor.

• Bann drayver evite stasyonn zot transpor dan milye semen e dan okenn fason ki kapab koz en konzesyon trafik e lenkonvenyans pour lezot dimoun.

• Evite zwe lanmizik for dan transpor dan vwazinaz, e osi lo larout piblik ki kapab vin en lenkonvenyans pour lezot dimoun.

• La ki Pei inn antre dan en peryod eleksyon, e bann aktivite politik pe ganny organize, lapolis I demande ki siporter pa sifok kanmarad ki kapab fini dan en bagar.

• Lapolis I lans lapel avek bann parti politik e kandida pour zot anvoy zot notifikasyon pou okenn aktivite politik boner parey lalwa I demande.
• Lapolis pou fer sir, ki zot ganny repons aler parey lalwa I demande

Lapolis I osi lans en lapel avek tou bann dirizan parti politik, e osi lezot dimoun ki pe mazinnen pou pran par dan sa eleksyon ki pe vini pou koz avek zot siporter pou pa fer dezord ler zot aktivite I fini.

I enportan ki tou dimoun I zwe zot rol e pran zot responsabilite pou montre sa matirite politik e pou evite ki I annan okenn dezord politik oswa vyolans.

Okenn lalwa ki pa ganny swiv I pour annan en konsekans e kapab annan sarz pou serten lofans ki ganny konmet.

Swe lapolis I ki tou I a fini byen.

En zonm 32an sorti Point Aux Sel, in pas devan Lakour Mazistra Anse Royale, ozordi bomaten kot in ganny rimann 14 zour andetansyon lapolis.

Sa I an koneksyon avek en lensidan, ki lapolis pe fer lanket ladan, ki ti ganny raporte avek lapolis le 18 Zilyet 2025, arive Les Canelles, kot sa zonm I sispe dan ka, pour lofans labi seksyel lo en adilt, koz dimal grav en endividi, kaptir en endividi avek lentansyon pour koz li dimal grav, e kaptir en endividi kont son volonte.

Jean-Paul Banane aze 34an sorti Anse Boileau ek Vanessa Payet aze 32an sorti Baie Lazare. In kondannen devan Lakour Siprenm, dan 3 ka. Sa I pour lofans Trafik en drog kontrole, An posesyon en drog kontrole e An posesyon zartifs pou fasilit servi ou trafik en drog kontrole.

Ziz in kondann Banane ek Payet, dan premye ka, 2 an prizon sakenn, avek en lanmann 40mil roupi sakenn, ki zot pour bezwen peye avan 1an. Ziz in ordonnen ki zot santans prizon I ganny sispann, pour 3an.

Dan dezyenm ek twazyenm ka, Ziz in kondann saken, en lanmann 5mil roupi an total, kot zot pour bezwen pey li avan 5mwan.

Banane ek Payet, ti komet sa lofans le 26 Zen 2024, Anse La mouche, landwa kot zot ti pe reste, kot lapolis ti aret zot an posesyon 46.40granm Heroin, 7.8 granm Canabis e an posesyon en balans nimerik ki lo la, ti kontenir latras en drog kontrole apele Harsish. 

Sa zonm 28an sorti Beau Vallon, ki ti lo rimann andetansyon lapolis, an koneksyon avek en ka Labi seksyel ki younit Child Proection, dan lafors lapolis ti pe fer lanket ladan.

In ozordi bomaten repas devan Lakour Siprenm, kot in formelman ganny sarze pour lofans Labi seksyel lo en miner, e pour donn en miner en drog kontrole. Sa akize ti komet sa lofans le 29 Zen 2025, dan rezyon Beau Vallon, e sa lensidan ti ganny raporte avek lapolis le 3 Zilyet 2025.

Ziz in rimann sa akize, prizon Montagne Posse, e I ekspekte repas devan Lakour le 31 Zilyet 2025.

Ivan, Christian Sinon aze 34an ki en patron sorti Anse La Mouche. In formelman ganny sarze devan Lakour Siprenm ozordi bomaten pour lofans lenportasyon en drog kontrole. E sa lot zonm ki ti osi sispe dan sa ka, ki ti lo rimann, li in aprezan ganny desarze dan sa ka, ki fer I en zonm lib.

Sinon ti ganny arete, apre ki en parcel tin antre dan pei, le 1 Zilyet 2025, ki ti kontenir bann pyes transpor ladan, ki zofisye customs e lapolis ti annnan soupsyon ki sa parcel ti kontenir serten ketsoz ilegal ladan, kot lapolis ti sezi 1993 granm Cocain dan sa parcel. 

Ziz in ordonnen ki Sinon, I ganny garde lo rimann Prizon Montagne Posse ziska le 24 Zilyet 2025, zour ki I ekspekte repas devan Lakour.