Lakour in ordonnen ki sa garson 16an i rimann pou ankor 14 zour andetansyon lapolis.

Sa garson 16an sorti Eden Village (Cosovo) ki ti ganny rimann an detansyon lapolis semenn pase apre ki in kas lord e kondisyon ki lakour tin enpoz lo li le 9 Mars 2023. Sa i apre ki i ti ganny vwar Sanmdi le 18 Mars 2023 granmaten par zofisye lapolis kot en lakaz dan en fonksyon Eden Village (Cosovo).

Departman Lapolis

En zonm 40 an ki reste Anse Norde in formelman ganny sarze devan lakour Mazistra ozordi pour 2 diferan lofans vol raporte kordgard Mont Fleuri le 15 ek 21 Mars.

Sa akize I menm zonm ki lapolis lo patrol ti arete yer an posesyon propriyete ki I pa ti kapab dir kote in gannyen, ki vedir I osi sispe dan lezot ka ki lapolis pe fer lanket ladan.

Apre ki in ganny sarze ozordi, I pann arive zwenn serten kondisyon sirtou en kosyon larzan ki Mazistra tin enpoze lo li pou son liberte provizwar alor I pou reste lo rimann ziska le 5 Avril zour ki I pou repas ankour.

En zonm dan son 30 tenn lannen sorti dan rezyon lavil, sispe dan en ka labi seksyel lo en fiy miner in ganny rimann 7 zour an detansyon lapolis antretan ki lapolis I kontinny lanket dan sa ka.

Lapolis ti ganny alerte lo sa lensidan resaman par en manm fanmiy sa viktim. 

Sispe dan lensidan pike lo “bus stop” kot Vines yer tar apremidi I ganny arete.

En madanm 50 an ki reste Perseverance in ganny arete koman sispe dan lensidan kot en madanm 35 an ti ganny pike lo “Bus stop” kot Vines lo lari wayal yer tar apremidi.

Sa madanm ki ti resevwar premye swen par lapolis apre ganny transporte par lanbilans pour plis swen medikal I aprezan dan younit swen entansif kot son kondisyon in ganny dekri koman kritik.

Sa sispe I ekspekte pe pas ankour ozordi apremidi antretan ki lanket dan sa ka I kontinnyen.

En zonm 55 an ki reste Takamaka in ganny ranmase mor dan lanmer kot vye Por lapes e lanket in etablir ki sa msye, Allain Macdonald Mondon, en peser tin tonm dan lanmer ver 8:03 diswar letan I tin al obor miray kot bato ki I lapes lo la tin mouye. 

Lekor Msye Mondon ti ganny trouve ver 6:10 bomaten par gard lakot Sesel apre ki kondisyon letan tin anpes zot ansanm avek zofisye lapolis lamarin kontinnyen avek zot resers swivan en premye rapor ki msye Mondon I manke fer ver 2:20 bomaten par en manm fanmiy swivi par en 2yenm fer ver 2:36 par en zofisye sekirike Por konmkwa I annan posibilite ki msye Mondon in tonm dan lanmer.

Dapre en koleg peser, li avek Msye Mondon ti pe bwar dan sa landrwa yer swar e apre li I tin sorti enkou e ler I ti retournen I pa ti vwar son koleg alor I ti enform sikirite.

Lapolis pe esper rezilta letopsi pou etablir ekzakt lakoz son lanmor.

Apre 2 semenn pase lo rimann swivan son larestasyon le 8 Mars, menm zour ki I tin bate e koz dimal serye en garson 21 an ki reste Les Cannelles, akize dan sa ka, en zonm sorti Mont Plezir in formelman ganny sarze devan lakour Mazistra apre ganny large lo plizyer kondisyon.

Pour son liberte provizwar sa akize in bezwen pey en kosyon 7,500 roupi e en lot dimoun in sinny enn 5,000 roupi pour li. I napa drwa enterfer avek temwen dan sa zafer. I pa devret komet okenn lofans parey pandan ki I deor. I bezwen sinny liv lakour kot kordgard Anse Royale 2 fwa par semenn. I bezwen aparet ankour sak fwa son ka pe pase.

Sa akize pou prosennman re aparet an kour le 5 Avril.

Lapolis in egalman raporte ki sa zonm Roche Caiman ki ti ganny anmenn ankour le 7 Mars e tin ganny rimann koman sispe pou plizyer lofans komet dan rezyon Mont Fleuri ant Zanvye ek boner sa mwan in formelman ganny sarze ozordi pour lofans vol pandan lannwit ( Burglary ), vole, kas lakaz osibyen ki pour lofans trespas kriminel.

Mazistra I osi akord demann lapolis pou sa akize i reste ankor 14 zour lo rimann ziska son prosen aparisyon ankour kot I ekspekte plede.

En zonm 27an sorti Grand Anse Mahe in ganny anmenn ankour ozordi kot in ganny rimann koman sispe dan en ka kas batiman e vole ki ti arive kot Stasyon Petrol Grand Anse Mahe tou resaman. 

Sa sispe ki ti ganny arete yer pou aprezan repas ankour le 28 Mars zour ki i ekspekte ganny sarze.

Lapolis antretan pe kontinnyen avek son lanket.

En zonm 32 an ki reste Anse Aux Pins in ganny anmenn ankour ozordi apremidi kot in ganny rimann koman sispe dan omwen 3 lensidan vol raporte arive kot 3 lakaz dan sa distrik le 15, 16 ek 17 Mars.

Sa sispe ki ti ganny arete ozordi granmaten pou aprezan repas ankour le 4 Avril zour ki i ekspekte ganny sarze.

Lapolis antretan pe kontinnyen avek son lanket.

En garson 16an sorti Eden Village (Cosovo) I ganny rimann an detansyon lapolis apre ki in kas lord e kondisyon ki lakour tin enpoz lo li le 9 Mars 2023 an relasyon avek lensidan Eden Village(Cosovo) le 24 Fevriye 2023 kot en zonm 30an avek en madanm 39an ti gravman ganny blese lo serten parti zot lekor. 

Sa sispe ti ganny trouve yer Dimans le 19 Mars 2023 granmaten par zofisye lapolis kot en lakaz dan en fonksyon Eden Village (Cosovo) apre ki lapolis tin reponn lapel lasistans lo en “scene” kot sa menm sispe ansanm avek lezot son bann koleg tin bles en zonm an rezilta en komosyon. 

Lord lakour ki sa sispe tin kase se I napa dwa konmet okenn lofans pandan letan ki i deor lo laliberte provizwar, en konvrefe ki komans depi 7er diswar ziska 6er bomaten e pou siryn liv lakour kordgard Mont Fleuri 2 fwa par zour.

Mazistra in ordonnen ki sa sispe I ganny garde an detansyon lapolis ziska le 23 Mars 2023 zour ki I ekspekte repas ankour