Lapolis pe egalman fer lanket kont en zonm 27an ki reste Anse Royale apre ki in sispekte servi kart labank en lot dimoun pour retir serten sonm larzan lo son kont. Sa sispe ti ganny arete yer Zedi swivan lenvestigasyon dan ka kot en garson 18an tin fer en rapor “wallet” perdi le 22 desanm dan rezyon lavil. Lanket dan sa ka I kontinnyen.

En zonm 32an sorti Roche Caiman ki pa dan lanplwa in pas ankour ozordi apremidi kot in ganny rimann ziksa le 27 Zanvye 2023.

Sa zonm I sispe dan plizyer ka vol dan rezyon lavil, Sa bann ka I enkli kas transpor, vole lo 2 bato, kas en stor kot serten lekipman bato e lanmizik pour en valer plis ki 150 mil roupi in estimen ganny vole. Lapolis pe kontinyen avek son lanket dan sa bann ka.

En zonm 29an sorti La Passe La Digue in formelman ganny sarze devan lakour mazistra ozordi bomaten pou 2 ka Trespas kriminel. Sa sispe ti konmet sa bann lofans le 4 Desanm 2022 e le 5 Zanvye 2023 lo La Digue menm.

Mazistra in larg sa aprezan akize lo serten kondisyon dan toulede ka tel ki en “ Bail Bond ” 10 mil roupi, pou pa enterfer avek temwen e konplenan dan sa ka, pou pa repet okenn lofans pandan letan ki I deor. Sa akize I ekspekte repas ankour le 25 Zanvye 2023.

En zonm 42an sorti Mont Buxton ki ti ganny bezwen par lapolis koman sispe dan plizyer ka kas lakaz e vole, vole dan laboutik e dan transpor in ganny arete yer tar apremidi dan en loperasyon konzwent dan rezyon Mont Buxton.

Sa sispe in pas ankour ozordi apremidi kot lakour in rimann li prizon Montagne Posse ziska le 26 Zanvye 2023 zour ki I ekspekte repas ankour.

En zonm 57an sorti dan distrik Au Cap in pas ankour ozordi bomaten kot in ganny rimann ziska le 26 Zanvye 2023 zour ki I ekspekte repas ankour.

Sa sispe ti ganny arete yer kot son rezidans an posesyon en drog kontrole osibyen ki en gro sonm larzan. Lapolis I soupsyonnen ki sa sispe ti fer serten aktivite ilegal.

Lanket dan sa ka I kontinnyen.

2 parmi sa 3 sispe zonm ki ti ganny arete Dimans swar dan en lensidan kase e vole dan laboutik batiman “Victoria Arcade” in pas ankour ozordi bomaten kot zot in ganny rimann ziska le 24 Zanvye 2023.

Sa i en zonm 30an e lot 32an toulede sorti dan distrik Perseverance. Sa 3yenm zonm li in ganny large apre pas atraver serten bann prosedir lanket. 

Antretan lapolis pe kontinyen avek son lanket dan sa ka.

Sa zonm 31an sorti Perseverance Ki tin ganny arete yer dan en laboutik lenz dan lari bazar Anvil pe vole. In pas ankour ozordi apremidi kot in ganny rimann ziska le 24 Zanvye 2023 zour ki i ekspekte repas ankour.

Richard Matombe I sa zonm 33an kin ganny trouve mor dan en lakaz abandonnen ozordi bomaten Anse Gaulette dan distrik Baie Lazare.

Sete en group zofisye lapolis ki ti lo patrol ki ti aprann sa lensidan atraver frer Matombe. Dapre sa frer, i tin ganny en koud telefonn sorti kot en zonm ki konn Richard ki tin enform li lo son lanmor dan sa lakaz abandonnen.

Sa rapor ti fer ver 9:45 bomaten. En lanket in komanse pour esey etablir sirkonstans otour lanmor Richard annatadan rezilta letopsi pour etablir ekzakt lakoz son lanmor.

Lapolis pe raporte ki sa zonm kin prezimen noye dan lanmer dan zanmerant “Ros Morel” Cote D’or Praslin ozordi bomaten in ganny idantifye koman Guy Georges Arrisol aze 63 an ki en zabitan Cote D’or menm.

Rapor sa lensidan trazik ti ganny fer avek lapolis par en msye atraver telefonn ver 9:37 bomaten. Dapre manm fanmiy, Msye Arrisol ki pa konn naze ti abitye al lapes an servan en “canoe”.

Lapolis pe fer lanket annatadan rezilta letopsi pou determin sirkonstans otour osibyen ki ekzakt lakoz son lanmor. 

In konfirmen ki en msye in ganny dimal lo serten parti son lekor pandan letan ki i ti pe travay pou retir en screen kot lapos Anvil avek lezot son bann koleg.  

Zofisye lazans servis tenny dife ek softaz in osi enterveni. Sa msye in ganny transporte lopital Sesel pou swen medikal. 

Lapolis in komans en lanket pou etablir sirkonstans otour sa lensidan.