En zonm 40an sorti Beau Vallon avek nasyonalite Kenyann. In prezimen noye dan lanmer Beau Vallon ozordi apremidi.

Lapolis ti ganny alerte lo apremidi pour lasistans, apre ki 3 zonm tin ganny apersevwar andetres dan lanmer, kot 2 parmi ti reisi ganny sove. Sa zonm ti ganny transporte lopital Sesel pou swen medikal dirzans kot plitar I ti ganny sertifye mor.

En lanket in komanse dan sa enn ka.

Departman Lapolis

6 dimoun in ganny arete yerswar, parmi i en miner aze 15an. E en zonm 55an li in admit lopital Sesel, e son kondisyon I stab. Sa ti anrezilta en lensidan kin arive Point Larue, kot en group zofisye lapolis ti ganny menase e atake.

Sa lensidan ti ariv apre ki en group zofisye lapolis tin mobilize pou fer larestasyon lo en zonm 36an sorti Point Larue, ki ti ganny bezwen par lapolis an koneksyon avek plizyer ka vol ki lapolis pe fer lanket ladan,

bann manm fanmiy ki ti pe kasyet li, ti anpese ki bann zofisye lapolis i aret sa sispe, kot plizyer fanmiy tin groupe e menas sa bann zofisye lapolis avek gran kouto e plizyer lobze, pou anpese ki sa sispe I ganny arete.

Lapolis ti bezwen rod ranforsman e sispe prensipal ti ganny arete dan plafon.

Sa bann sispe i ekspekte aparet ankour Lendi Bomaten. Departman Lapolis I fortman kondann bann tel aksyon parey anver son bann zofisye, e en tel aksyon parey pa pou ganny tolere. Lapolis i oule fer rapel manm piblik ki en lofans pou abrit en endividi ki ganny bezwen par lapolis.

Departman Lapolis

Valentino Hoareau in ganny arete

Servis Prizon Sesel e Lapolis i konfirmen ki Valentino Hoareau, ki tin sove dan Prizon Montagne Posée le 13 Zanvye 2025, in ganny arete ozordi swar e i aprezan an detansyon lapolis.

Lapolis i remersye tou endividi kin ede dan en fason ou en lot avek lenformasyon pou ki Valentino Hoareau in kapab ganny arete.

Departman Lapolis

En zonm 24an sorti St. Louis, ki tin ganny transporte Lopital Sesel pou swen medikal dirzans, ozordi bomaten. Anrezilta en aksidan kot Lorloz in ganny trete apre plitar ganny large.

Dapre rapor inisyal ki lapolis in ranmase, sa zonm ki ti pe dray en transpor, tin sorti ver Lari Lendepandans pe fer direksyon ver Lorloz, o moman sa aksidan, kot son transpor ti savir par kote lo semen. Lapolis ti ganny alerte lo sa aksidan ver 8er 50 bomaten, e en lanket in komanse dan sa enn ka.

Departman Lapolis

Swivan lanket ki ti deza an progre dan ka kot 3 zonm Seselwa ti ganny entersepte abor en bato lwazir par Gard Lakot Sesel le 7 Oktob 2024, pour lofans lenportasyon en drog kontrole, e konplo pou enport en drog kontrole. Sa I kanabis zerbaz anviron 29 kilo granm, anviron 25 kilo granm Heroin (Diamorphine) e anviron 137 kilo granm kanabis rezin, kot plitar Dylan Kate, Sonny Valentine, Oris Tirant, Craig Ferley, Lisa Fanchette, Alfredo Ernesta, ek Robin Micock ti formelman ganny sarze devan Lakour Siprenm le 21 Oktob 2024 an relasyon avek sa ka.

Ozordi bomaten le 13 Zanvye 2025, 4 nouvo sispe in formelman ganny sarze devan Lakour Siprenm dan sa ka, nonmen Myriam D’unienville aze 49an sorti Anse Possession Praslin, Jean Francoise Adrienne aze 58an ki en kondannen, Neddy Micock aze 51an ki en kondannen e Aaron Dugasse aze 30an sorti Marie Jeanne Estate Praslin. Ziz ki ti pe ekout sa ka in ordonnen, ki sa 4 akize I ganny rimann andetansyon lapolis ziska le 27 Zanvye 2025.

Departman Lapolis

En Msye avek en Madanm, tou le de avek nasyonalite Franse in admit lopital Sesel, e zot kondisyon i stab. Sa I anrezilta en lensidan kin arive Sanmdi apremidi dan Park Maren St Anne.

Dapre rapor inisyal ki lapolis in ranmase, sa 2 endividi ti pe "snorkeling", dan sa park maren, kot a en moman donnen, i sispekte en bato in pas dan lokasyon kot zot ti ete. Anrezilta kot tou le de in sibir dimal lo plizyer parti zot lekor.

Lapolis pe demann okenn Maren, ou operater bato, ki ti dan sa zanmerant Sanmdi apremidi kinn temway sa lensidan, pou antre an kontak avek sant komann lapolis lo 4288000.

Departman Lapolis

En madanm 41an sorti Perseverance in ganny rimann 14 zour andetansyon Lapolis koman sispe dan en ka prezimen mert ki lapolis pe fer lanket ladan.

Lapolis ti ganny alerte lo sa lensidan yer Zedi le 9 Zanvye 2025, ver 8er 20 diswar. En lanket detaye in komanse dan sa enn ka annatandan rapor rezilta letopsi pour etablir sirkonstans otour lanmor sa zonm 39an osi sorti Perseverance, ki ti konpanny sispe dan sa ka.

Departman Lapolis

En zonm 37an sorti Anse Poule Bleu, Baie Lazare ki tin ganny arete le 7 Zanvye 2025, koman sispe dan serten ka ki lapolis pe fer lanket ladan, pour lofans ka trafik imen, travay forse san en lapey anretour e lagresyon fizik lo en endividi.

In pas devan Lakour Siprenm, kot in ganny large lo sa bann kondisyon swivan; Ziz in ordonnen ki sa sispe I sinny en “Bail Bond” 100mil roupi, pou prezan devan Lakour a sakfwa son ka pe ganny ekoute, I napa dwa kit ziristriksyon Sesel, pou remet son paspor e dokiman vwayaz avek Lakour, pou pa enterfer avek bann temwen e konplenan dan sa ka, pou sinny Liv Lakour toule Merkredi dan kordgard Baie Lazare. Viktim I en Bangladeshi.

Departman Lapolis

Romeo Lavigne aze 35an ki pa dan en lanplwa sorti Grand Anse, Praslin. In formelman ganny sarze devan Lakour Mazistra Mahe, dan en seri ka kas lakaz e vole, ki ti ganny raporte avek lapolis arive pandan mwan Septanm e Desanm 2024, lo Praslin menm.

Mazistra ki ti pe ekout sa ka, in larg Lavigne lo sa bann kondisyon swivan; kot I pou bezwen pey en kosyon 5mil roupi pou son laliberte provizwar, pou prodwir en dimoun koman en garanti 10mil roupi dan son ka, pou pa komet okenn lofans similer pandan letan ki I deor lo laliberte provizwar, pou pa enterfer avek temwen dan sa ka, pou sinny Liv Lakour dan kordgard grand Anse, Praslin 2 fwa par semenn.

Romeo Lavigne pan reisi akord demann Lakour, pou pey sa kosyon 5mil roupi, ki fer in aprezan ganny riman andetansyon servis Prizon Sesel, ziska le 20 Zanvye 2025. Si I arive pey sa kosyon I pou ganny large e I pou bezwen sivre sa bann kondisyon swivan, ki Mazistra in enpoz lo li.

Deaprtman Lapolis