En garson 16an sorti St Louis in kondannen devan Lakour Pour Bann Minner dan 4 ka. Sa I pour lofans koz dimal grav en endividi, vole, menas an servan vyolans, e andomaz propriyete.

Ziz in pas sa bann santans swivan lo sa kondannen; I pour anba sipervizyon probasyon aparti le 18 Septanm 2025, ziska le 18 Septanm 2026, I pour bezwen demontre bon konportman dan lakominote, I pour bezwen prezan devan Lakour ler ki I ganny bezwen, I pour bezwen sivre en progranm reabilitasyon ki osi enkli pour drog, kot I pour ganny teste a nenport ki moman, en kouvrefe depi 7er diswar ziska 6er bomaten, e pour pa komet ou ganny sarze avek okenn lofans similer pandan letan ki I deor lo laliberte provizwar anba sirveyans servis Probasyon.

En garson 16an sorti Anse Aux Pins, in kondann en lanmann 15mil roupi avek 18 mwan Prizon, kin ganny sispann pour en peryod 2an, devan Lakour Pour Bann Miner. Sa I pour lofans andomaz propriyete.

Sa kondannen ti komet sa lofans le 9 Zen 2021, Anse Aux Pins dan zanmerant en letablisman diverstistman, anrezilta en aksidan ki tin arive, kot transpor ki i ti pasaze ladan, ti fer kolizyon avek en pickup, e anrezilta en largiman kot I ti andomaz konpletman “windscreen” sa pickup.

Si sa kondannen pa arive pey sa kosyon 15mil roupi, I pour deservi en term, 12 mwan Prizon.

En garson anba laz sorti dan rezyon Nor Mahe, in kondann en lanmann 15mil roupi, ek en lanmann 20mil roupi, devan Lakour Pour Bann Miner. Sa I dan 2 ka, pour lofans lagresyon fizik lo en endividi.

Sa kondannen ti komet sa lofans le 28 Desanm 2020, Mont Signal, kot I ti bles en adilt avek en gran kouto, e koz li dimal lo serten parti son lekor.

Ziz in ordonenn ki en sonm 15mil roupi an total, I al koman en konpansasyon pour sa viktim. Si sa kondannen pa arive pey sa lanmann 35mil roupi an total, I pou deservi en term 2an Prizon.

Chanio Kilindo ek Liam Alcindor in kondann en term 2an Prizon devan Lakour Mazistra Anse Royale, kin ganny sispann pour en peryod 2an avek sakenn en lanmann 7mil 500 roupi, ki zot pour bezwen peye avan le 25 Novanm 2025, kot si zot pa peye zot pour deservi en term 6 mwan Prizon.

Kilindo ek Alcindor ti komet sa lofans le 27 Oktob 2024, dan distrik Anse Aux Pins, kot zot ti vol en scooter, e plitar lapolis ti reisi rekiper sa scooter ki tin ganny raporte vole.

Enrique Maringo aze 22an sorti Anse Royale, in kondann 2an Prizon, kin ganny sispann pour en peryod 2an, avek en lanmann 7mil 500 roupi. Sa I dan en ka vol.

Maringo ti komet sa lofans le 19 Zen 2022, dan en landwa diverstisman Au Cap, kot I ti vol en sonm larzan dan en lofis, dan sa letablisman.

Darius Talma aze 24an sorti Beau Vallon, in kondann 6an Prizon devan Lakour Siprenm. Dan 3 ka, pour lofans an posesyon en drog kontrole.

Ziz ki ti pe ekout sa ka ti kondann Talma en term 6an Prizon dan premye ka, pour lofans an posesyon en drog kontrole. Sa ti 819.8 granm Heroin (Diamorphine), dan dezyenm ka en term 2an 6 mwan Prizon, pour lofans an posesyon en drog kontrole, sa ti 361.7 granm kanabis, e dan twrazyenm ka touzour pour lofans an posesyon en drog kontrole 79.4 granm kanabis, Talma in kondonn en term 1an Prizon. E Ziz in ordonnen ki letan ki in fer lo rimann I ganny dedwir lo son santans, e ki son santans I mars ansanm, ki fer I pour selman fer 6an Prizon.

Talma ti komet sa lofans le 19 Me 2025, apre ki lapolis tinn fer lafouy kot son rezidans Beau Vallon, kot sa bann drog kontrole tin ganny dekouver e sezi dan son lasanm.

I enportan note, ki dapre gidans pour santans, pour bann ka lofans relye ek drog, ki osi pour an posesyon en drog kontrole valer 600 granm Heroin ou plis, I posiblenman kapab anmenn en santans 20an Prizon ou menm Lavi Prizon.