2 sispe garson, enn 16an e lot 17an ki Lapolis ti pe rode an koneksyon avek en lensidan arive le 24 Fevriye 2023 Eden Village (ex Cosovo Estate) kot en zonm 30an avek en madanm 39an ti ganny blese in ganny arete.

Sa 2 sispe in ganny anmenn ankour kot zot in ganny rimann ziska le 9 Mars 2023, zour ki zot ekspekte repas ankour. 

En zonm 24an avek nasyonalite Filipino sorti La Gogue in admit dan younit swen entasif lopital Sesel dan en leta kritik anrezilta en aksidan moter kin arive Anse Etoile ozordi granmaten.

Lapolis ti ganny alerte lo sa aksidan ver 1er 13 bomaten . Dapre rapor preliminer ki lapolis in ranmase sa zonm ti pasaze lo en moter avek enn son koleg zonm 26an letan ki moter ki i ti lo la ti perdi kontrol e al rann lapel anba semen. En lanket in komans dan sa enn ka pou etablir sirkonstans otour sa aksidan.

2 zonm en 21an e lot 26an in ganny blese dan en bagar granmaten dan en letablisman diverstisman dan rezyon Lavil.

En zonm 26an sorti Roche Caiman in ganny blesir ase serye lo serten parti son lekor enkli dan son lanmen kot in bezwen ganny koup en ledwa “amputated”. E en zonm 21an sorti Persevrance li in ganny pike avek en lobze pwent lo en parti son lekor anrezilta en bagar dan en Letablisman diverstisman dan Lavil.

Sete en group zofisye lapolis ki ti lo patrol dan sa rezyon ver 2er 15 bomaten ki ti apersevwar en zonm avek blesir lo li ki ti pe rod led andeor sa Letablisman diverstisman kot deswit zot ti rod lasistans medikal. Anrezilta sa bagar lapolis ti bezwen fer frenmen sa Letablisman diverstiman.Toulede zonm ti resevwar tretman spesyalize kot lopital Sesel apre plitar ganny large.

Sa zonm 21an ki tin refize pou ganny admet lopital Sesel ti ganny arete pas atraver serten prosedir lanket apre plitar ganny large. Lapolis pe kontinyen avek son lanket dan sa enn lensidan.

En zonm 47an sorti Grand Anse Mahe in ganny atake e blese avek en gran kouto enpe partou lo son lekor dan zanmerant Dan Fatak Anse Gaulette. Sa zonm in admit D'offay ward lopital Sesel e son kondisyon i stab. 

Lapolis ti ganny alerte lo sa lensidan ver 12:30 apremidi e pe rod sa agreser ki reste Val dan D'ore dan distrik Baie Lazare. Antretan lanket in komanse dan sa enn ka pou etablir sirkonstans otour sa lensidan.

2 Sispe pou kas Kiosk Cable & Wireless I ganny arete.

En zonm 32 an ki reste Roche Caiman avek en lot zonm 44 an ki reste Baie Ste Anne Praslin in ganny arete yer swar swivan lanket ki lapolis pe fer dan ka kot en seri kiosk pour lakonpannyen Cable and Wireless in ganny kase e larzan vole ladan ant le 18 Desanm a 26 Fevriye.

Sa 2 sispe ki ti ganny arete yer swar lo Praslin pe fer fas avek lofans kas batiman avek lentansyon pour komet lofans vol, pour lofans vole osibyen ki pour lofans andomaz propriyete.

Mazistra in akord demann lapolis pou ki zot reste an detansyon legal, ki vedir zot in ganny rimann pou repas ankour le 16 Mars.

Lanket dan sa bann ka in kontinyen 

Lapolis I anrezistre premye fatal pour sa lannen.

En garson 21 an, Imier Dubel ki reste Anse Kerlan in perdi son lavi swivan en aksidan arive dan zanmerant erport Amitie lo Praslin yer swar.

Sa aksidan ki ti kolizyon en moter ki Dubel ti pe monte avek en pti bis Toyota Hiace ti ganny raporte avek lapolis ver 9:05 diswar.

Dapre drayver sa pti bis, en zonm 48 an ki reste Grand Anse,i dir ki I ti sorti direksyon Grand Anse pour Amitie e letan I ti koupe pou antre kot erport I ti tann en lenpak tape e ler ti ti arete e debarke I ti war en moter ki tin fer kolizyon ek son transpor e sa ‘rider’ tin ganny dimal .

Lanbilans SCAA tin reponn lapel pou asiste anmenmtan ki zofisye lasante ti arive pou pran kontrol sitiasyon.

Malerezman apre ganny stabilize lo ‘scene’, transporte lopital Baie Ste Anne, Dubel ti mor dan prezans dokter ek nurse letan I ti pe ganny transporte Mahe pour swen pli spesyalize.

Sa fatal lo Praslin I premye ki lapolis I anrezistre pour 2023.

Lanket I an progre dan sa ka.

Sa 2 sispe garson, enn 21an sorti Lari Angar ek lot 17an sorti Belonie ki tin ganny arete yer an koneksyon avek en lensidan blese dan rezyon Lavil Sanmdi granmaten in pas atraver serten prosedir lenvestigasyon apre ganny large antretan ki lenvidans I kontinyen amase pou konplet zot ka pou zot ganny prosekite.

Lanket dan sa ka alor I an progre.

Lapolis in resevwar rapor letopsi ki dapre patolozis lapolis sa lanmor ti enn ki violan e ki lakoz lanmor sa pti baba I an rezilta ekspoze ek lasaler tre o e osi delo dan son lanmwel.   

En zonm 39an ek en madanm 29an toulede avek nasyonalite Ris in formelman ganny sarze devan lakour siprenm ozordi bomaten pou lofans omisid en volanter e kriote kont en zanfan ki ganny trouve anba “ Children’s Act section 70 ( 1 B ) “.

Sa I konsern sa lensidan boner Zanvye sa lannen kot en pti baba 17 mwan ti ganny kite dan en transpor kot ‘carpark’ en gym dan distrik Anse Royale e ganny sertifye mor plitar kot sant Lasante Anse Royale.

Lakour in larg sa aprezan 2 akize dan sa ka lo serten kondisyon tel ki remet zot paspor avek lakour, siryn liv lakour kot kordgard Anse Royale 1 fwa par semenn e pou siryn en kosyon 25 mil roupi. Sa 2 akize pou repas ankour le 8 Fevriye 2023. 

Lapolis pe raporte ki en madanm 53an in prezimen pann deor kot I ti pe reste Petit Paris ozordi granmaten. Sa lensidan ti raporte avek kordgard Anse Aux Pins ver 5er bomaten.

En lanket in komanse annatadan rezilta letopsi pour etablir ekzakt lakoz son lanmor.