Lapolis pe raporte ki sa 2 fiy, enn 15 e lo 17 an sorti Perseverance osibyen ki en garson 18 an ki lanket ti pe ganny fer kont zot an relasyon avek lofans donn fo lenformasyon e gaspiyaz resours (giving false information and wasteful employment of resources) in ganny sarze ozordi bomaten pour sa 2 lofans. Tou le 3 in ganny large e zot espekte respas ankour le 23 Zanvye 2023.

Lapolis in raporte ki Jean Paul Ren Reginald  18 an avek Abraham Christ Matombe  18 an in kondann prizon pou lofans kas batiman e vole.

Sa 2 zenn in sakenn ganny en term prizon  ant 1 a 4 an pour sak dan sa 8 laboutik ki zot ti kase e vole ladan Unit House lannen pase.

Apre ki zot tin pled koupab, Mazistra ki ti pe ekout sa zafer in konsider tou largiman prosekiter osibyen ki avoka ladefans e deside ki bann term prizon sa 2 akize I mars ansanm.

Sa I vedir ki Reginald ek Matombe pou fer selman sakenn 4 an prizon e ladan letan ki zot in fer lo rimann pou ganny dedwir lo zot santans.

Touzour konsernan sa ka en fiy 17 an ki li in pled koupab pou lofans resevwar propriyete vole in ganny en santans 300 erdtan travay kominoter anba sipervizyon servis probasyon. Lezot kondisyon atase avek lord mazistra pour sa fiy I en progranm reabiltasyon ki I bezwen swiv.

Pou rezon medikal, en 3yenm  garson 17 an ki osi akize pou lofans kas batiman e vole pa ti kapab atenn lakour letan sa 3 lezot ti plede e I ekspekte fer sa le 11 sa mwan apre I ava ganny son kondannasyon.

Mazistra ti pas santans lo sa 3 zenn an desanm 2022.

En zonm 31an sorti Marie Janne Estate lo Praslin in ganny rimann 14 zour przion Montagne Posse pou sa bann lofans swivan kin ganny raporte arive  Cote Dore Praslin le 3 Zanvye 2023 apremidi.

*Sa i pou an posesyon en drog kontrole

*Reziste larestasyon

*Koz dimal en zofisye lapolis

*Lagresyon fizik lo zofisye lapolis

*Andomaz propriyete gouvernman

*An posesyon zouti ofansiv.

Sa sispe ti ganny entersepte par en group zofisye lapolis ki ti lo patrol apre ki zot tin sispekte serten aktivite ilegal pe deroule dan sa lokasyon. Pandan letan ki bann zofisye ti pe al fer lafouy lo sa sispe I ti vin agresiv e anpese ki lafouy fer lo li kot in lager e menas sa bann zofisye avek en kouto ki ti dan son posesyon a sa letan.

Anrezilta reziste larestasyon 1 zofisye lapolis in ganny blese dan son lanmen avek sa kouto e lot in  sibir dimal lo serten parti son lekor. Toulede zofisye ti resevwar tretman lopital Baie St Anne Praslin apre plitar ganny large.

Lanket I deza an progre dan sa ka e lapolis pe fortman kondonn bann tel aksyon parey kont okenn son bann zofisye lapolis e pe demann manm piblik pou resepkte son bann zofisye pandan letan ki zot pe travay pou mentenir lord ek lape dan lakominote

En zonm 40an sorti La Gogue in ganny rimann 14 zour andetansyon lapolis pou plizyer  lofans vol an servan vyolans, kas lakaz e vole, andomaz propriyete e reziste larestayon.

Parmi serten sa bann lofans tin ganny konmet pandan mwan Desanm 2022 e boner Zanvye 2023. Larestasyon sa sispe tin vin pandan wikenn dan rezyon Lavil kot I ti servi vyolans pou menas en madanm avek en kouto e vol son sak apre taye. Sete 2 zofisye lapolis madanm ki ti entersepte e tay avek sa sispe answit aret li dan zanmerant en Casino dan rezyon lavil.

En garson 16an e lot dan son 20- tenn lannen toulede sorti dan distrik Anse Royale in ganny arete yerswar dan rezyon lavil pou andomaz propriyete kot en kasino e enterfer avek louvraz lapolis.

Lanket i deza an progre dan sa enn ka e lapolis pe fer formalite pou prosekit sa 2 sispe devan lakour pou lofans ki zot in konmet.

Sete en pti garson ki ti apersevwar lekor Rose pandan letan ki i ti pe pase e apre enform en adilt ki ti answit rod lasistans lapolis. Lanket ki deza an progre pa pe demontre okenn siryn ou aksyon malisye dan lanmor Rose. In etablir ki Rose tin sorti lo en pye mang e tonbe kot in resevwar dimal grav lo serten parti son lekor. 

Lapolis ti ganny alerte lo sa dekouvert ver 10er 50 bomaten.

2 garson aze 21 an sorti dan Nor Mahe ek 2 zonm sorti Corgate Estate dan distrik Mont Fleuri in ganny arete e pe ganny detenir. 

Sa i an koneksyon avek 2 lensidan tretman vyolans kin arive ozordi dan distrik Perseverance apre ki zot in servi serten zouti ofansiv avek lentansyon pou konmet lofans pandan letan ki zofisye lapolis ti pe fer serten travay.

Lapolis in komans en lanket dan sa 2 lensiden e i annan lentansyon pou prosekit sa 4 sispe. 

Departman Lapolis  

Lapolis pe raporte ki sa pti fiy 10 an kin mor yer swar i apel Hessa Lafortune ki reste Petit Paris e ki ti dan en fonksyon prive kot en lakour Pointe Larue dan konpani son manman.

Sa lensidan trazik in an rezilta blesir serye ki Hessa tin resevwar lo serten parti son lekor apre ki I tin bat dan en “sliding door” letan I ti pe zwe avek lezot son bann pti kanmarad.

Lapolis pe fer lanket dan sa lensidan ki lotorite medikal ti enform li lo la ver 22:38 diswar apre ki Hessa tin ganny transporte “casualty” par en transpor prive pour lasistans medikal.