En zonm 41an sorti Les Mamelles in ganny anmenn ankour ozordi apremidi kot mazistra in rimann li an detansyon lapolis ziska le 27 Avril 2023.

Sa zonm I sispe dan en lensidan kot en madanm in ganny atake e bate yer Les Mamelles. Sa madanm in admit lopital Sesel e son kondisyon I stab.

En garson 20an ek en lot 22an sorti Mont Fleuri in ganny arete, pas atraver serten prosedir lanket apre ganny large antretan ki lapolis I konplet zot ka pou prosekisyon an relasyon avek lofans ekstorsyon larzan an servan menas.

O moman zot larestasyon tar apremidi le 5 Avril dan rezyon Lavil lapolis ti osi sezi dan zot posesyon larzan ek sibstans ki sispekte drog kontrole hashish. Anplis ki sa enn parmi sa 2 sispe tin donn lapolis en fo non ki egalman I en lofans anba lalwa.

Tou le e 2 sispe pou aprezan retourn kot lapolis le 19 Avril.

En garson 24 an ki reste Dame Le Roi, Baie Lazare in formelman ganny sarze devan lakour Mazistra yer Mardi le 11 Avril pour 3 diferan ka vol osibyen ki pou komet lofans trespas kriminel.

Sa 3 ka kot sa garson ti antre lo propriyete ki pa pou li e vol fri raporte Kordgard Anse Royale ti ariv 22 Novanm 2022, 16 Fevriye e le 3 Avril 2023. Swivan son larestasyon le 7 Avril e ganny sarze le 11, sa akize in ganny rimann Prizon Montagne Posee akoz I pann reisi zwenn serten kondisyon sirtou en kosyon larzan ki I ti bezwen peye pou son liberte provizwar.

Sa akize pou aprezan repas ankor ankour le 25 Avril.

En zonm 34an ki reste Bougainville in ganny arete e pe ganny ankete pour lofans trafike osibyen ki pour kiltivasyon drog kontrole kanabis apre ki i ti ganny arete an posesyon plis ki 500 gram sa sibstans osibyen ki plis ki 2000 plant sa menm sibstans ti ganny dekouver e sezi lo son propriyete.

Sa sispe ki ti ganny arete le 4 Avril Bougainville ti pas devan lakour Siprenm le 6 kot in ganny rimann ziska le 20 Avril.  

En garson 27an sorti Green Estate Au Cap in admit dan Younit Swen Entansiv lopital Sesel e son kondisyon in ganny dekrir koman kritik.

Sa i apre ki sa garson tin ganny tape avek en transpor ki ti pe fer direksyon Casurina Au Cap an sortan ver Lavil. Drayver sa transpor i en zonn 41an sorti Au cap in pas atraver serten prosedir lanket apre plitar ganny large lo en "Bail" kot i pou raporte Lendi.

Antretan lapolis i kontinyen avek son lanket dan sa enn ka pou etablir sirkonstans otour sa aksidan.

En paran in personelman eksprim son gratitid e lapresiasyon anver bann zofisye kordgard Perseverance swizan zot entervansyon kin posibleman ede sov lavi zot garson ki annan en kondisyon mantal yer bomaten.

Swivan en koud telefonn anonim yer ki i annan en garson pe azir dan en fason abnormal lopon Perseverance ki al Anse Etoile zofisye kordgard Perseverance ti deswit reazir pou asiste .Apre evalye sitiasyon e pasyans dan zot enteraksyon avek sa garson ki a en moman ti pe menase pou zet son lekor sorti anler lo bor pon sa 2 zofisye ti ganny sans atrap li e sekiriz li. Sa garson ki pati pe koze ti plitar ganny remet avek son paran yer swivan lapel fer par lapolis pou dimoun ki konn li pou etablir kontak avek kordgard sa distrik.

Menm si paran sa garson tin demontre zot lapresiasyon yer, manman sa garson i retourn kot sa kordgard ozordi pou en portre souvenir avek nou bann zofisye .Direksyon lapolis i salye devouman e kouraz sa bann zofisye.

Lakour in ordonnen ki sa garson 16an i rimann pou ankor 14 zour andetansyon lapolis.

Sa garson 16an sorti Eden Village (Cosovo) ki ti ganny rimann an detansyon lapolis semenn pase apre ki in kas lord e kondisyon ki lakour tin enpoz lo li le 9 Mars 2023. Sa i apre ki i ti ganny vwar Sanmdi le 18 Mars 2023 granmaten par zofisye lapolis kot en lakaz dan en fonksyon Eden Village (Cosovo).

Departman Lapolis

En zonm 40 an ki reste Anse Norde in formelman ganny sarze devan lakour Mazistra ozordi pour 2 diferan lofans vol raporte kordgard Mont Fleuri le 15 ek 21 Mars.

Sa akize I menm zonm ki lapolis lo patrol ti arete yer an posesyon propriyete ki I pa ti kapab dir kote in gannyen, ki vedir I osi sispe dan lezot ka ki lapolis pe fer lanket ladan.

Apre ki in ganny sarze ozordi, I pann arive zwenn serten kondisyon sirtou en kosyon larzan ki Mazistra tin enpoze lo li pou son liberte provizwar alor I pou reste lo rimann ziska le 5 Avril zour ki I pou repas ankour.

En zonm dan son 30 tenn lannen sorti dan rezyon lavil, sispe dan en ka labi seksyel lo en fiy miner in ganny rimann 7 zour an detansyon lapolis antretan ki lapolis I kontinny lanket dan sa ka.

Lapolis ti ganny alerte lo sa lensidan resaman par en manm fanmiy sa viktim. 

Sispe dan lensidan pike lo “bus stop” kot Vines yer tar apremidi I ganny arete.

En madanm 50 an ki reste Perseverance in ganny arete koman sispe dan lensidan kot en madanm 35 an ti ganny pike lo “Bus stop” kot Vines lo lari wayal yer tar apremidi.

Sa madanm ki ti resevwar premye swen par lapolis apre ganny transporte par lanbilans pour plis swen medikal I aprezan dan younit swen entansif kot son kondisyon in ganny dekri koman kritik.

Sa sispe I ekspekte pe pas ankour ozordi apremidi antretan ki lanket dan sa ka I kontinnyen.