En zonm 26an sorti Au Cap i ganny arete pou lofans koz lanmor en dimoun par dray dan en fason danzare e dray en transpor lo larout piblik avek konsantrasyon nivo lalkol par lao limit ki lalwa i preski. Sa sispe in ganny anmenn ankour apremidi kot Mazistra in larg li lo serten kondisyon tel ki pey en lanmann 7mil roupi pou son laliberte provizwar, remet son paspor e kart laysens avek lakour, pa entenfer avek temwen dan sa ka e pou aparet ankour a sakfwa son ka i pase.

Viktim i en zonm 46an avek nasyonaltie Bangladeshi. In etablir ki o moman sa aksidan sa viktim ki ti drayver en konmiyon ki anmas salte, i ti pe travay avek 2 lezot koleg letan ki transpor ki sa sispe ti pe dray sorti direksyon lavil ti tap li e koz li dimal serye partou lo son lekor.

Sa viktim ti resevwar premye swen sirplas par zofisye lapolis. Lanbilans SCCA e osi lanbilans lopital ti osi reponn lapel pou lasistans dan sa ka. Sa viktim ti ganny sertifye mor sirplas par patolozis lapolis. Lapolis ti ganny alerte lo sa aksdian ver 3er 15 bomaten. En lanket in komanse dan sa ka.

Lapolis I oule egalman fer sorti, ki a oken moman I pann atas portre sa viktim avek son kominike preliminer sa aksidan. I sagrinan ki menm avek plizyer demann dan lepase pou annan respe pou fanmiy viktim ler I ariv bann aksidan ou lensidan grav, sa I kontinyen. Lapolis pe demande ki sa ki annan sa portre or dan bann group, pou annan enpe konpasyon e retir sa portre.

Sa garson i sispe dan plizyer ka kas lakaz e vole, parmi i enn ki ti arive le 18 Novanm 2022 dan rezyon Point Larue kot i ti kas en lakaz e vol serten bizou valer enpe plis ki 150mil roupi. 

Sa sispe ti ganny entersepte dan rezyon La Passe apre ki bann zofisye tin sispekte ki i ti pe fer serten trazaksyon ilegal. Swivan lafouy fer lo sa sispe lapolis ti dekouver dan son posesyon serten kantite sibstans ki zot prezimen i en drog ilegal.  

Lanket i an progre dan sa ka pou ki sa sispe i ganny prosekite devan lakour.

Mazistra in rimann en zonm 32an sorti Petit Paris, pou 14 zour andetansyon Lapolis ankoneksyon avek en ka vol an servan vyolans. Sa ka ti ganny raporte avek lapolis le 23 Oktob 2022 apre ki en msye Endyen ti ganny atake e vole serten sonm larzan ki ti dan son posesyon Parson Estate, Petit Paris. Sa sispe pou re pas ankour le 1 Desanm 2022.

En garson 19an in admit lopital Sesel e son kondisyon in ganny dekrir koman stab anrezilta en aksidan yer tar apremidi, Anse Gaulette, Baie Lazare.

Sa ki In kapab ganny etablir se ki pandan ki en bis Sptc ti pe fer ayer pou vire dan en lale Anse Gaulette, en scooter ki ti pe fer direksyon Lazare Picault ti perdi kontrol apre ki i tin sey fer mannev pou say sa bis. I pann reisi e anrezilta in tap avek sa bis kot in koz domaz.

Lapolis ti ganny alerte lo sa aksidan ver 6er diswar.En lanket in komanse dan sa ka.

Sa msye Alman 69an In yer ganny retrouve pri dan en kap ros Anse Maron avek bokou dimal lo plizyer parti son lekor.

Sete en gid ki a sa letan ti pe pas dan sa landwa avek en group kliyan ki ti apersevwar sa msye kot I tin pri dan en kap ros e i ti rod lasistans lapolis. Sa loperasyon resers ti pran enpe plis ki 3erdtan kin enkli pou retir sa msye e transport li dan bato ziska La Passe kot I ti answit ganny transporte lopital Logan pou swen medikal avan ganny transfer lopital Sesel kot in admit.Son kondisyon in ganny dekrir koman stab.

An ki konsern sa 4 viziter ki tin perdi, in etablir ki pandan letan ki zot ti pe osi vin ede pou rod zot koleg sa msye Alman ki tin perdi, zot in osi perdi larout lo Trail.Sete zofisye ki ti angaze dan sa lopearsyon resers ki ti asiste zot e plitar retourn avek zot kot zot destinasyon.

En zonm 44an sorti dan distrik Anse Aux Pins in formelman ganny sarze devan lakour mazistra ozordi pou lofans kas lakaz e vole, e pou vole dan en lakaz  Fore Noire dan distrik Mont Fleuri le 13 Oktob 2022.

Mazistra tin enpoz serten kondisyon lo sa akize tel ki en kosyon 8mil roupi ki I ti pou bezwen peye pou son laliberte provizwar, sinny  liv lakour 2 fwa par semenn kot kordgard Anse Aux Pins e pou pa ganny sarze pou okenn lofans pandan letan ki I deor lo laliberte provizwar. Sa akize pann reisi akord demann lakour ki fer I aprezan ganny riman.

Rapor preliminer ki lapolis in ranmase sa drayver bis en zonm 44an sorti Mont Buxton ki ti pe fer larout  Union Vale. Sa sispe zonm aze 55an sorti Mont Buxton tin ganny demande par drayver bis pou debarke an relasyon avek en problenm konsernan peyman tiket.

Pandan ki i ti pe debarke, sa sispe ti bles sa drayver deryer son ledo avek en kouto ki ti dan son posesyon apre taye. En group zofisye lapolis ki ti deza dan sa zanmerant ti temway sa lensidan kot zot ti reisi aret sa sispe sirplas. Sa drayver bis ti ganny transporte lopital Sesel pou swen medikal.

Kelvin Wirtz aze 32an sorti Rochon in yer formelman ganny sarze devan lakour Mazistra Perseverance pou lofans vol ki ti ganny raporte avek lapolis le 27 Oktob 2022,dan zanmerant Rochon.  Mazistra ti enpoz serten kondisyon lo sa akize e en lanmann 3mil roupi ki i ti pou bezwen peye pou son laliberte provizwar.Wirtz pann kapab akord demann lakour kot in ganny rimann prizon Montagne Posse ziska ler I kapab pey sa sonm larzan.

Dan en lot ka separe,

Ronny Domingue aze 42an sorti Les Mamelles in formelman ganny sarze devan lakour Mazistra Perseverance yer dan 3 ka.

Sa I Kas lakaz e vole, trespas kriminel apre vol dan lakaz. Mazistra ti enpoz serten kondisyon lo sa aprezan akize  pou son liberte provizwar kot I ti pou bezwen pey en sonm 10mil dan sakenn sa bann ka ki fer en sonm 30 mil roupi an total, 3 dimoun koman garanti ki ti pou bezwen pey en sonm 10 mil roupi sakenn dan sak ka ki fer en sonm 30 mil roupi, raport kot kordgard Mont Fleuri 2 fwa par semenn pou vin sinny liv lakour, pa repet okenn lofans pandan letan ki I lo liberte provizwar e pou pa enterfer avek temwen dan sa bann ka. Domingue pann reisi satisfer demann lakour ki fer I aprezann ganny riman andetansyon servis prizon ziska ler I kapab akord demann lakour.

Swivan en loperasyon konzwent par gard lakot Sesel e Lapolis Lamarin en patron bato aze 46an sorti Cascade e son 2 lekipaz sa I en garson 19an e lot 24an toulde sorti dan Nor Mahe ti ganny arete apre ki lafouy tinn ganny fer par bann zofisye lo sa bato. En gran kantite  “ prezimen lavyann torti ” ti ganny dekouver abor sa bato. Bann lazans konsernen enkli Minister Lanvironnman ti ganny alerte lo sa dekouvert. Sa bann “ prezimen lavyann torti ” in ganny sezi. Sa bato enkli son bann manm lekipaz abor ti ganny eskorte par gard lakot Sesel e lapolis Lamarine pou destinasyon Mahe. Swivan analisis preliminer lo sa bann lavyann in konfirmen ki sa I lavyann torti e estimen pez enpe plis ki 100 kilo granm.

Sa ka ti ganny raporte arive Sanmdi le 12 Novanm 2022 dan zanmerant Zil Alphonse.

Toulede 3 sispe in ganny anmenn ankour ozordi bomaten pou lofans anposesyon lavyann torti ilegalman. Mazistra in larg sa bann sispe lo serten kondisyon tel ki en pey en lanmann 8 mil roupi sakenn, prodwir 2 dimoun koman garanti pou en sonm 100 mil roupi, remet zot paspor avek lakour, raport kordgard Santral 3 fwa par semenn, en restriksyon mouvman ki komans aparti 7er diswar ziska landmen 6er 30 bomaten e zot pou napa dwa kit Mahe. Sa bann sispe pou re pas ankour le 29 Novanm 2022.