Lapolis pe konfirmen ki depi yer tar apremidi in komans lanket dan en ka swivan rapor ki en pti garson 11 an in ganny pran par en zonm dan en loto nwanr deor baro kot lekol Primer Plaisance. 

Sa pti garson ki reste Roche Caiman  ti ganny sans sove apre ki sa drayver tin arete, debarke e kit li tousel dan loto parlao dan semen legliz Cascade. 

Rapor sa lensidan ti fer Kordgard Mont Fleuri ver 4:50 par tantin sa pti garson ki tin war li tousel lo grann rout Cascade e apre tann son zistwar.

Pandan ki i pe fer son lanket pou rod sispe enplike dan sa lensidan, Lapolis pe dekouraz bann post lo rezo sosyal ki montre  portre zot kamarad, video, oubyen fer komanter anreferans avek sa ka e osi lezot ka ki kapab afekte son lanket.

Dimoun ki annan lenformasyon kredib an relasyon avek sa enn ka pe plito ganny demande pou kontakte biro  CID irzan.

Dan menm lalinny lapolis pe tret serye alegasyon ki I annan 3 transpor avek dimoun maske ladan ki pe fer letour lavil dan milye lannwit e pran dimoun pou al koman garanti aletranze pou zot bann tranzaksyon drog. Ziska prezan lapolis pe konfirmen ki in napa rapor formel dimoun manke pandan sa bann dernyen zour, e pe demann nenport endividi ki kapab konfirm sa alegasyon  pou kontake biro CID irzan.

Lapolis I garanti konfidansyalite e idantite sa ki fourni lenformasyon.

Finalman Ianket e  rapor medikal dan lanmor sa 2 msye Laporte, papa ek son garson ki ti mor se zot Reef Estate Sanmdi bomaten in demontre ki napa akt malisye dan zot lanmor.

Sete manm lafanmiy ki reste ansanm avek zot ki ti raport lensidan lanmor zot pros avek  lapolis.

En garson 14an sorti Port Glaud in admit D'offay ward lopital Sesel anrezilta en aksidan Bisiklet yerswar Port Glaud.Son kondisyon in ganny dekrir koman stab.

Lapolis ti ganny alerte lo sa aksidan ver 6er 15. Sa garson ansanm avek en group manmay ki ti pe mont bisiklet sorti dan direksyon lo Montany Fore Noire Port Glaud pe desann dan desant ver borlanmer avek vites letan ki i ti perdi kontrol son bisiklet e al bat dan en miray kot en lakaz. Sa garson ti answit ganny transporte par lanbilans kot sant lasante Anse Boileau pou premye swen.

Lapolis pe avertir bann paran swivan serten konplent ki noun resevwar kot sa group manmay pe fer vites dan desant Port Glaud preski toulezour. Sa ki responsab pe osi ganny averti ki aksyon neseser pou ganny pran kont zot ki pe koz serten nwizans e osi neglizans lo larout piblik ki poz en danze pou lezot dimoun.

Le 16 Septanm 2022 Ziz lakour siprenm; Mohan Burhan in fer lord final dan en ka ki Unit ki responsab pour fer lanket dan krim finansyel dan Lapolis Sesel (FCIU) ti anmenn devan son lakour an Zilyet 2020. 

Sa Unit i raporte ki sa ka i konsern en bato lapes Iranyen (dhow)ki zot ti sezi an 2020 apre ki sa menm bato ti ganny servi pou transport drog kontrole tel koman 784.6 granm opium e 97,945. 1 granm heroin dan lanmer sesel. 

Sa Unit i eksplike ki sa bann dimoun a bor sa bato, en group Iranyen ti ganny akite par lakour dapel sesel lo en baz teknikalite. Swivan sa FCIU ti anmenn en ka anba lalwa “Proceeds of Crime Civil Confiscation Act” (POCCCA) pour sezi sa bato ki a sa letan ti vo ant 500 mil a 600 mil roupi sesel.

Sa Unit i eksplike ki swivan en batay legal vreman long, avek lasistans Biro Atorni Zeneral, zot in reisi ganny lord final dan faver gouvernman e ki la sa bato i aprezan vin propriete leta.

En zonm Brazilian aze 26 ans, ki ti ariv Sesel lo en vol Emirate sorti Dubai, le 24 September 2022 bomaten e ganny entersepte par zofisye ladrwann, imigrasyon ek lapolis in formelman ganny sarze ozordi bomaten devan lakour siprenm pour lofans lenportatsyon plis ki 5 kilo Cocaine ki en drog kontrole.

Sa akize pe reste lo rimann anba detansyon Lapolis pou ankor 14 zour avan ki I repas ankor ankour.

Lapolis pe fer lanket dan en lensidan ki ti ganny raporte kordgard Beau Vallon yerswar ver 6er 40 diswar apre ki en zonm ti ganny atake e vole dan son transpor Belombre. Sa ataker ti mord sa zonm lo son lebra vole apre taye. 

Sete en zofisye lapolis ki pa ti pe travay a sa letan ki ti entersepte sa sispe tar yerswar dan zanmerant bazar Belombre. I ti aret sa sispe avek led sivilyen prezan e remet avek kordgard Beau Vallon, lapolis in reisi rekiper serten propriyete ki sa sispe tin vole pli boner e pe rod sa lot akonplis frer sa sispe ki aze 30an sorti Belombre. 

Sa 2 Sispe zonm tin osi enplike dan en lensidan vol an servan vyolans kot en laboutik Belombre pli boner sa semenn.

Lapolis pe raport lo 2 lanmor kin arive ozordi bomaten kot en lakaz Reef Estate dan distrik Anse Aux Pins. Sa i en Papa 92an ek son garson 46an.

Premye rapor ti ganny fer ver 7er 30 bomaten apre ki sa papa tin ganny vwar pa pe reazir zofisye medikal ti reponn lapel lo teren.Tes Covid 19 ti ganny fer sirplas in demontre ki sa msye ti pozitiv pou covid 19. Plitar ver 10er bomaten en 2yenm rapor ti ganny fer kordgard Anse Aux Pins kot son piti 46an ki ti osi reste avek li tin osi ganny vwar pa pe reazir dan son lasanm. Tou lede dimoun ti ganny sertifye mor lo scene.

Lanket ki deza an progre pa pe demontre okenn akt ou sir malisye dan lanmor sa papa ek son piti. Antretan lapolis pe esper rapor rezilta letopsi pou determin lakoz ekzakt zot lanmor.

Sa i en alegasyon kot en zonm sispe ki ti an detasyon lapolis dan en ka vol an servan vyolans ki ti arive Belombre Zedi swar pe refer sorti ki in ganny bate avek serten zofisye. Sa lot  lensidan i annan rapor ki en zofisye in kraz vit en loto pandan en spot check kin arive ozordi apremidi Hilltop Glacis.

Lapolis in komans en lanket dan toulede ka.

Lapolis in raporte ki 3 sispe in ganny arete e pe pas atraver bann prosedir lanket an relasyon avek en ka kot en sonm ant 15 a 20 mil roupi in raporte ganny vole dan en laboutik Bel Ombre yer swar.

Sa 3 sispe zonm kin ganny arete I aze ant 27 a 34 an e tou le 3 i zabitan Bel Ombre menm.

Lanket dan sa ka I an progre.

Lapolis I oule enform manm piblik sirtou zabitan Baie Lazare ki son biro baze kot Sant kominoter e ladministrasyon distrik pou fermen apartir 7 er diswar demen vandredi le 7 e pou reouver pou servis lendi bomaten le 10 Septanm.

Pandan letan ki sa biro pou fermen, dimoun ki bezwen lasistans pou bezwen telefonn sant Komann anvil oubyen kordgard Anse Royale.

Lenkonvenyans ki sa I kapab koze nou byen regrete.

Lapolis pe fer lanket dan 2 ka separe kot dife in ganny mete entansyonnelman dan 2 diferan landwa Point Aux Sel tar yerswar.

Lapolis ti ganny alerte lo sa lensidan ver 10:58 diswar ki ti annan dife dan en platansyon Bannann obor semen grann rout pa lwen avek en laboutik e letan ki bann zofisye tin reponn lapel lo sa scene zot ti ganny alerte ki I annan en lot pe pran derye lasapel pa lwen avek kot sa enn premye.

Zofisye lazans servis tenny dife ek sovtaz sorti stasyon Anse Boileau ti osi bezwen enterveni pou tenny sa 2 dife. Swivan sa 2 lensidan, Lapolis pe fortman kondann bann tel aksyon ki pe ganny fer avek move lentansyon e pe demann okenn manm piblik ki annan lenformasyon krebid lo sa de lensidan pou kontakte CID Anse Royale lo 4372050 ou sant komann lapolis lo 4288000.