En garson 20an e lot 23an sorti dan distrik Belombre in ganny arete e pe deteni an koneksyon avek en ka vol kin arive ozordi bomaten Belombre. Sa i apre ki zot ti vol sak en madanm 80an ki tin fek debarke dan en Bis Belombre dan ver 9er 30 bomaten letan i ti pe antre kot son lakour apre taye. En des erdtan pli tar lapolis ti lokaliz sa 2 sispe, zot in ganny arete e pe ganny deteni. Serten popriyete in osi ganny rekouver.

Lapolis in komans en lanket dan sa enn ka.

Departman Lapolis

Kominike

En zonm 35an ki en Fermye sorti Beolier in ganny rimann andetansyon lapolis ziska le 26 Zilyet 2023 zour ki i ekspekte repas ankour. 

Sa i an koneksyon avek en ka kot in bles en zonm 43an, sorti Port Glaud ki ti arive le 20 Zilyet 2023 Dezarpan, Beoliere. Sa zonm i ankor admit lopital Sesel e son kondisyon i stab.

Departman Lapolis

Kominike

En zonm sorti Mont Buxton in kondann 5an Prizon dan en ka labi seksyel e lagresyon seksyel lo en miner.

Sa lofans ti arive ant Desanm 2020 e Fevriye 2021 dan rezyon Glacis, kot sa kondannen ti fer labi seksyel e lagresyon seksyel lo sa miner ki ti aze 13an sa letan.

Ziz ki ti pe ekout sa ka in kondann li 5an pou lofans Labi seksyel, e 5an pou lagresyon seksyel, me in ordonnen ki son santans I mars ansanm e letan ki in fer lo rimann I ganny dedwir lo son santans.

Departman lapolis.

Kominike ( Update )

3 garson aze 15an sorti dan rezyon Beau Vallon in ganny arete.

Sa i swivan lanket ki lapolis ti pe fer dan en lensidan kot en scooter ki tin ganny raporte vole dan rezyon Belombre le 10 Zilyet 2023, ver 11er 15 bomaten, e plitar ver 8er 10 diswar lapolis ti ganny alerte lo en lensidan kot en scooter ti pe pran dife lo laplenn Beau Belle.

Departman Lapolis

Kominike 

En zonm 36an sorti La Louise in ganny arete ozordi bomaten par en group zofisye lapolis sorti Santral an koneksyon avek en ka vol lo Airport ki ti ganny raporte avek lapolis yer apremidi. 

Anrezilta larestasyon sa sispe zonm 36an. Lapolis in fer lafouy dan serten landwa kot zot in reisi rekiper mazorite sa bann larzan ki tinn ganny raporte vole dan sa ka. 

Departman lapolis I oule felisit son bann zofisye pou sa travay tre vit ki zot in fer, kin port en rezilta pozitiv.

Antretan lapolis I kontinyen avek son lanket dan sa enn ka.

Departman Lapolis.

Kominike

Lapolis I annan lentansyon pou prosekit 2 sispe pou lofans “harboring a minor”. Sa I en zonm ek en madanm.

Sa ka i konsernan sa fiy 13an sorti Anse Royale ki tin ganny raporte manke depi Vandredi le 14 Zilyet 2023 e ki tin ganny vwar yerswar kot en lakaz Anse Royale par en group zofisye lapolis.

Lapolis pe lans en lapel avek manm piblik pou pa soutir okenn manmay anba laz, kot zot san konsantman son paran.

Departman Lapolis.

Kominike 

En zonm 32an sorti Port Glaud, ki pa dan lanplwa in formelman ganny sarze devan lakour Mazistra pou lofans kas batiman e vole ki ti arive dan Port Glaud le 17 Zilyet 2023.

Mazistra in larg sa aprezan akize lo serten kondisyon tel ki pou pey en kosyon 10mil roupi, pou li kapab ganny large lo laliberte provizwar, pou pa ganny sarze ou komet okenn lofans similer pandan letan ki I deor lo laliberte provizwar, pou pa enterfer avek konplenan e temwen dan sa ka, pou raport kot lakour mazistra Anse Royale toule Vandredi, pou raport korgard Port Glaud 3 fwa par semenn pou siryn liv Lakour. 

Mazistra in osi fer lord ki si sa aprezan akize I kas okenn sa bann kondisyon kin ganny enpoze kont li, i pou rimann ziska ki son ka I terminnen devan lakour. Sa akize pann reisi akord demann lakour pou pey son kosyon 10mil roupi, ki fer I ganny rimann andetansyon Servis Prizon Sesel ziska le 31 Zilyet 2023 zour ki I ekspekte repas ankour.

Departman Lapolis.

Kominike 

Sa zonm 46an sorti Bel Air, ki pa dan lanplwa ki ti lo rimann andetasnyon lapolis. In repas devan lakour ozordi bomaten kot in formelman ganny sarze pou lofans vol dan 4 ka separe.

Mazistra in larg sa aprezan akize lo serten kondisyon tel ki pou pey en kosyon 2mil roupi dan sakenn sa ban ka, ki fer en total 8mil roupi, ki I pou bezwen peye pou li kapab ganny large lo laliberte provizwar. Pou pa komet ou ganny sarze avek okenn lofans similer pandan letan ki I pou deor lo laliberte provizwar, pou siryn liv lakour 3 fwa par semenn kot kordgard e en kouvrefe depi 6er diswar ziska 6er bomaten.

Sa akize pann reisi akord demann lakour ki fer I ganny rimann andetansyon Servis Prizon Sesel ziska le 31 Zilyet 2023 zour ki I ekspekte repas ankour.

Departman Lapolis.

Kominike

In konfirmen ki loperasyon resers pou rod sa zonm avek nasyonalite Nepale apele Furpu, Chhiring Bhote aze 38an ki ti en travayer lo Ile Moyenne, ki tin ganny raporte manke avek lapolis le 2 Zilyet 2023 in aprezan arete.

Sa i apre plizyer zour resers ki lapolis in fer lo Ile Moyenne enkli lo lanmer e otour lakot sa zil. E lezot zil dan zalantour ki pann abouti dan naryen.

Antretan lapolis i kontinyen avek son lanket dan sa enn ka.

Comminique 

The Seychelles Police Department has confirmed that search for Mr. Furpu, Chhiring Bhote, aged 38 years with Nepali National, had stopped. 

Mr. Furpu, Chhiring Bhote, who was a worker on Ile Moyenne, reported missing on the 2nd of July 2023. So far the police have conducted search on the island, at sea including costal areas and around other islands close by to Ile Moyenne nothing has been found.

Investigation into this matter is still ongoing.

Police Department.

Kominike

Sa zonm 43an sorti Anse Aux Pins ki ti an detansyon lapolis an koneksyon avek en lensidan ki ti arive Cascade Sanmdi bomaten, kot en zonm 34an sorti North East Point ti ganny blese. In pas ankour ozordi bomaten kot in formelman ganny sarze pou lofans koz dimal grav en dimoun.

Mazistra in larg sa aprezan akize lo serten kondisyon tel ki pey en kosyon 10mil roupi pou son laliberte provizwar, ki in fini peye, pou pa enterfer avek temwen e konplenan dan sa ka, pou raport korgard Anse Aux Pins toule Vandredi pou siryn liv lakour, pou pa komet ou ganny sarze avek okenn lofans similer pandan letan ki I deor lo laliberte provizwar e pou prezan devan lakour a sakfwa ki son ka pe pase.

Sa akize pou repas ankour le 31 Zilyet 2023.

Departman Lapolis